No.4328/2021-2022

Aizawl, 19th March, 2022 : March 17 & 18 khan Sports Minister Pu Robert Romawia Royte chuan Mamit district hmun hrang hranga SYS Deptt hnathawhte a endik a, Assam ramria Mizoram Police Camp 2 a tlawh bawk.

Mamit khawpuia Multipurpose Indoor Stadium Rs 1250/- lakh senga sak mek te, Mamit Tourist Lodge behchhana Hostel sak belh dan turte Tourism Department hotute nen an en bawk a. Sports Minister hian Mamit daia Mamit Sports School Rs 3400 kakh senga sak mek enin Mamit District Sports Complex Rs 4400/- lakh senga sak tan mek chu a tlawh bawk a ni.

Pu Robert Romawia Royte chuan Laldenga Football Ground Tuidama sak mek pawh tlawhin Contractor ten Phullem leh Drainboard pawh Tuidam a thlen tawh thu leh May 2022-ah field hnathawh hi zawh hman tum a nih thu Minister hi an lo hrilh a ni. Sports Minister hian Kawrthah Residential Sports School Rs 3300/- lakh senga sak mek pawh a hmunah a tlawh a, he school behchhana Synthetic Football Ground siam mek pawh a tlawh bawk.
Pu Robert Romawia Royte chuan Chief Minister zahawm tak Pu Zoramthanga’n lung a lo phum tawhna ahte hmasawnna hna chak taka thawh vek a ni leh, thenkhat chu zawh mai tur a lo ni ta chu a lawmawm a tih thu a sawi a, Contractor thenkhat hnathawk muang deuhte erawh chu Covid dinhmun a ziaawm tawh avangin nasa lehzuala tan la turin a fuih a. Hna thawk chak theilo an awm chuan an chungah action lak zat zat a ni ang tiin hna quality thalo chu thiahtir leh zel an ni ang a ti bawk.

Nimin vek khan Minister Pu Roberta chuan Thinghlun rama Assam ramria Mizoram Police te Duty Camp a tlawh a, Sipaiten TV an neih loh avangin TV lian leh sa leina turin Rs 30,000/- a pe a. Sipaite insawizawi na tura sports infrastructure siam nan Rs 30 lakh ruahman a ni tih a hrilh a. Thinghlun ramah hian Police 30 lai an awm a ni.
Minister hian Assam ramri tho Mitdel lui Police Camp a tlawh bawk a, Police te ruai theh nan Rs 30,000/- pein TV lian a pe bawk. Mitdel luiah pawh hian Police 30 zet an awm a ni.

Pu Robert Romawia Royte chuan Police te chu fakawm a tih thu sawiin, Mizo mipuiin an thawhrimna leh huaisenna an fak a, Mizoram Sorkar pawhin an hnathawh ropuizia a hre reng a ni a ti.

He huna tel ve Pu R.Lalngheta, Central YMA President pawhin thu sawiin Sorkarin ramri a ngai pawimawh a, theihtawp chhuaha Police te a hmuna a dah chu lawmawm tiin YMA pawhin ramri venhim a ngai pawimawh tak zet tih a sawi a. Police te huaisenna fakin ruihhlo laka fihlima, an taksa sawizawi chak reng turin a fuih a ni.

Minister Pu Robert Romawia Royte hi SEDP Board Vice Chairman & Ex-MLA Pu TC Pachhunga leh official pawimawh dang ten an tawiawm a ni.

Attachment

  • Loading attachment...