No.4327/2021-2022

Aizawl, the 19^thMarch 2022 : Nimin khan Law, Judicial & Parliamentary Minister Pu TJ Lalnuntluanga’n Calcutta Mizo Welfare Association (CMWA) in Chapchar Kut lawmna hun Mizoram House, New Town, Kolkata ah an buatsaih chu khuallin niin a hmanpui.

Minister Pu TJ Lalnuntluanga chuan hmanlaia Chapchar Kut hman chhan nia an sawi dan thenkhatte sawi chhawngin Chapchar kut hi hlawhchhamna leh beidawnna atanga lo chhuak angin sawi thin nihmahse, zirtirna tha tak a keng telin ka hria a, chu chu khawvel hi a eng zawnga thlir thiam a tulin beiseina nung kan hmalam hun hi kan pan tur a ni, ti a. Hnam nihphung ziarang chawisan leh chhawm nun zel pwimawh thu sawiin Minister chuan ram a lo changkang zela, hnam-in changkan lam kan pan zel bawka, hetih rual hian kan hnam nihphung zia rang mila kan than chhoh hi a tul takzet a ni. Khawvelin hma a sawn a, hnam dang hovin hma an sawn a, kan hnam pawhin Pathian zarah hma kan sawn ve zel ang. Hetih lai hian, Mahni hnam nihphung kalsan a changkan san hi thil pawi tak a ni a, a ti a. He hunah kalkhawm te chu ram leh hnam a him a, kan dam khawchhuah zel nan kan hnam nih phung zah pui lo in chhawm nung zel ang u tiin a fuih a ni.  

Minister chuan Social media hmanna kawngah fimkhur a tul thu sawiin kan thu hriat leh chhiar te hi thu dik a ni em tih te hi, bel chiang hmasa thin ila; ngaihtuah chiang lo taka thil kan ngaihruatna nen kan va sawi ve vak vak khan mi te rilru kan va hliam viau thei a ni tih hre rengin, social media a kan thil sawi leh kan thiltih ah te pawh kristian kan nih anga hawihhawm taka tawngkam hman te pawh a hnam anga kan in zir thar a ngai viau in ka hria, a ti.

Pu TJ Lalnuntluanga chuan hmasawnna a pawimawh rualin Mizoram leh hnam a him a, hnam zalen leh ram ralmuang kan nih reng chu thil paiwmawh tak anih thusawiin hemi kawngah hian ngaihtuahna leh rilru hrisel put thiam a pawimawh a, kan thiamna leh finna te mi dang fuihpawrh nan kan hman chuan nghawng tha lo tak a nei theiin ka hria a chuvangin kan thiamna leh finna te hi midang tana malsawmna a nih thei nan kan hman a pawimawhin a tul hle a ni, a ti. 

Nimina Kolkata a Chapchar Kut lawmna programme hi chawng hniha  hman niin chhawngkhatna hi Rev. JC Lalramliana, President, CMWA in a kaihruai a, chawng hnihna programme ah hian hnam lam leh zai ten nen hun hman a ni a. Joint Resident Commissioner Mizoram House Kolkata Pu Jacob Lalawmpuia pawhin thusawina hun neiin Chapchar Kut ngaihhlut a tulzia te a sawi a ni.