Vawiin chawhma khan MZU Auditorium ah Chief Secretary Pu Lalmalsawma chuan New Economic Development Policy(NEDP) hnuaia Mizoram sawrkar hmalakna pawimawh tak pakhat, Entrepreneurship Development Scheme(EDS) a hawng. Sumdawnna kawng inkawhhmuhna programme, EDS hawnna ah hian mithiam sawmbik, Mizorama sumdawng hlawhtling tak tak te leh zirlaite an tel a ni.

EDS hawngtu Chief Secretary Pu Lalmalsawma, Chairman, Mizoram State Entrepreneurship Development & Monitoring Committee (MEDMOC) ni bawk chuan Mizoram ah entrepreneur hlawhtling tak te leh bul tan mekte an awm thu a sawi a. Heng mite hi ram nghahfak leh ram hmasawnna bul tumtu annih avangin anni hian mitam zawk zirtirna an pek leh kaihhruai hi sawrkarin a ngaipawimawh em em a ni a ti.

Chief Secretary chuan Entrepreneurship pawimawhna sawrkarin a hriat avanga EDS chu siam anih thu a tarlang a; kum (2016-17) chhungin bultan nan Mizoram sawrkar chuan EDS atan bik hian Rs 2.00 crores a dah tih sawiin Financial Year thar ah pawh a tul phawt chuan sum tam zawk dah thei turin sawrkar chuan rilru zau tak a put thu a sawi. Mahni kutke a dinchhuah tumna atanga hmalak danglamna tarlangin, " Entrepreneurship hi mahni kutkawih ngeia eizawnna, a taima leh remhria apiangte dinchhuahna ani a, qualification leh eligibility a ngai ve lova, kum bithliah leh hnathawh hunbi a ngaih ve loh avangin mitin ban phakah a awm", a ti. Mizoram sawrkarin entrepreneur te hmakhua ngaiin a la kalpui ngailoh scheme, EDS chu entrepreneur te nen thawhhona tha taka kalpui a nih chuan Mizoram hmakhua a eng tih Chief Secretary chuan tarlangin thalaite tan chonna thar nise a duh tiin sawmna a siam a ni.

Thusawitu dang, Dr. C.Vanlalramsanga ,Planning Secretary, leh MEDMOC Alternate Chairman ni bawk chuan opening remarks neiin "entrepreneurship" chu sustainable resources, knowledge leh market kan neih theih nan a pawimawh hle tih sawiin tuna Mizoram dinhmun, Subsistence economy atanga market economy a lawnkai nana NEPD hnuaia sawrkar hmalakna a ni a ti. EDS chu kan chenna leh a chhehvel boruak, ramngaw leh nungcha tidanglam em em lova thui tak kalpui theih, programme anih angin UN in 17 Sustainable Development Goals(SDGs) goals a kalpui tum tihhlawhtlin nan pawh a pawimawh hle tih a tarlang. Entrepreneurship Development chu tunlaiah khawvel leh India ram State te intlansiakna a ni tih a sawifiahin Mizoram State economy siamthat nana hmalakna awmze nei berte zing ami a nih avangin Sawrkar pawhin a dah pawimawh hle a ni a ti. Inaugural Session hi Pu Zothan Khuma, Commisssioner & Secretary, Commerce & Industries in a kaihruai a. He hunah hian sumdawnna bultan duhtute tana inkaihruaina lehkhabu, Entreprenuership Kailawn (Manual ) chu buatsaih a nih dan te sawihawnna, Pu Joseph. L. Ralte, lehkhabu buatsaihtu in a neih hmasak hnu ah Chief Secretary Pu Lalmalsawma chuan a tlangzarh a . Launching Programme Cum Workshop hi Pu Saihlira , Principal Adviser, Planning Department in lawmthu sawina neiin a khar a ni.

Chawhnu Session hi Workshop leh sawihona hun atan hman niin Pu Benjamin , ID & AS , Commissioner & Secretary, Higher & Technical Education Dept in a kaihruai a. Mizoram a entreprenucrs hlawtling te, College hrang hrang a final year zirlai te, ITI leh ICFAI a zirlai leh an faculties te, MZU a Department hrang hrang hotute, Mizoram Skill Development Society leh Youth Commission hotute bakah Science & Technology, Commerce & Industries, LE & IT official te an tel a. Pu Joseph L Ralte, Dr, Laldinliana Varte, MZU leh Pu Rinzuala UNDP te chu Workshop ah hian Expert Panel ah an thu a. Workshop ah hian sawihona leh rawtna tha tak tak te neih a ni.