Chief Secretary Pu Lalmalsawma, IAS chuan vawiin chawhnu khan Mizorama cham mek Indian Ambassador to Myanmar Pu Vikram Misri, IFS chu Chief Secretary Conference Hall-ah a kawm.

Ambassador Pu Vikram Misri chuan Myanmar hrula India state awm zingah chuan Mizoram chu ralmuang leh harsatna thlen tlemna ber a nih thu sawiin, India leh Myanmar inlaichinna tha zawk leh insumdawntawnna tihmasawn tura hmalakna hrang hrang kalpui mekah Mizoram chu a pawimawh hle a ni, a ti a. Kaladan Multi-Modal Project chu chak zawka thawh a nih theih nan Mizoramin harsatna a tawh ang angte India Sorkar laipuiah thlen a tum thu a sawi a. Insumdawntawnna tihmasawn turin Border Haat siam belh tum a nih thu te tarlangin, Zokhawthar Land Custom Station hman tangkai a nih dan te, Mizoram kaltlanga dan lova thil lakluh/ thawnchhuah awm chungchangte sawiho a ni bawk.

Chief Secretary Conference Hall-a meeting neihah hian Commerce and Industries Department leh Public Works Department hotute an tel a ni.