Vawiin khan Chief Minister Pu Lal Thanhawla, Labour, Employment & Industrial Training changtu Minister ni bawk hovin L E  & IT Department Commissioner & Secretary Pu Benjamina leh LE &IT Department Director Pu Lalhmachhuana leh an thawhpui dangte chuan meeting an nei a, Department hnathawh, hmalakna, harsatna leh hmabak awmte sawiho a ni a. Nalanda Institute of Advanced Studies (NIAS) chungchangte; Mizoram Building & Other Construction Workers’ Welfare Board (MBOCWWB) chungchangte, Mizoram Youth Commission (MYC) chungchangte, ITI dinhmun chungchangte, Department kaihhruaina hnuaia Skill Mission huang tihzauha hmalak dan chungchangte leg Department indaih lohna chungchangte bakah Employees’ State Insuarance Corporation (ESIC) Society din chungchangte pawh sawiho a ni bawk.

Chief Minister Pu Lal Thanhawla chuan Labour Employment & Industrial Training Department chu Department pawimawh tak, ITI leh skill development hmanga thalai te tan eizawnna kawng siamsak theitu leh kawng kawhhmuhtu anih angin Department hmalakna leh ruahmanna te chu fimkhur leh uluk taka ngaihtuah a kalpui a tul leh a pawimawh thu a sawi a. Chutiang tur chuan ruahmanna reng reng chu chik tak leh uluk taka zirchiang turin Department hotute a hrilh a ni.

NIAS chungchangah meeting ah hian zirlai 32 atangin zirlai 6 final exam atan hming pe an awm thu tarlan a ni a, Deparment chuan heng zirlai 6 ten hlawhtling taka an exam an paltlang chu a ngaihpawimawh avangin he thil hi an enzui reng tih an sawi a. Course fee peklawk tawh refund chungchang chak taka bawhzui mek a ni thu Department hotute hian an sawi a. He thila mawhphurtu nia puh te lakah Department Proceedings kalpui mek(drawn) a nih thu meeting ah hian tarlan a ni bawk.

MBOCWWB chungchanga CAG 2016 Report a thil fello leh dan paih bak thil tih tarlan ani te chu meeting ah hian sawiho niin he thilah hian action la turin Department chu a inpuahchah mek tih an sawi a. A chhawrtu tur ten an tangkaipui theih dan ber leh anih dan tur ang taka he Board hi a kal thei nan, Board chu restructure leh constitute that a tul thu tarlan niin hemi atana hmalakna tur te sawiho a ni. MCBOCWWB Rules 2015 dan siamthat chungchang pawh sawiho a ni bawk.

Mizoram Youth Commission (MYC) chu thalai tam takin an tangkaipui hle tih sawiin, thalai ten an chhawr zel theih nan tun a project kalmek te sawiho a ni a, a kal zelna tur pawh meeting ah hian sawiho a ni a. Chairman leh Secretary post ruak hnawhkhah chungchang pawh sawiho niin thalai te tan he Commission hi a pawimawh avangin a pangaia hna an thawh leh vat a tul thu sawilan a ni bawk.

Mizorama ITI te dinhmun tarlan niin thawktu (Principal leh Instructor) indaih loh avangin harsatna an tawh mek thu sawiin Department hotute chuan post ruak thenkhat chu hnawhkhah vat a tul an ti a, hemi atan a tul te bawhzui turin Chief Minister chuan Department hotute chu a hrilh a. Aizawl, Lunglei leh Siaha ITI mamawh sawiho niin Champhai, Serchhip leh Kolasib a ITI din nan a, an  hmalak tawh chin te tarlan a ni bawk a. Social Welfare Department hnuai a MSDP kaltlanga West Phaileng leh Chawngte a ITI din tur dinhmun te pawh sawiho a ni.

LE & IT Department chu Skill Development thilah reng reng Nodal Department an nih tul dante sawiin CM Skill Mission te hnathawk thei tura duan a tul thu te pawh meeting ah hian sawiho niin hmalak dan tur pawh rel a ni a. Skill Development Mission Mode a kalpui dan chungchang pawh sawiho a ni a. Labour Laws enforce dan leh Employees’ State Insuarance Corporation (ESIC) Society din nana hmalak tawh chin pawh meeting ah hian sawiho a ni bawk.