Telangana tourism tihlarna turin Telangana Tourism Department chuan vawiin khan Hotel Floria roof top, Dawrpuiah Road Show an buatsaih.  

Road show-ah hian Telangana sorkara Youth Advancement Tourism & Culture (YAT&C) Secretary Pu B. Venkastesham, IAS chuan Mizoram chu India ram state zinga nghahloh dawr nei awmchhun, lirthei khalhtuten bengchheng siam lova motor an khalhna hmun, State entawntlak tak nia a hriat thu a sawi a. Telangana State chungchang sawiin India chhim leh hmar intawhna, inthliar hranna awm lova mi zawng zawng tlangnel taka an chen theihna hmun a ni, a ti.  

Telangana State Tourism Development Corporation (TSTDC) Chairman Pu Pervaram Ramulu, IPS(rtd) pawhin Telangana State pian chhuah dan a chinchhuakin a sawi a. Mizoram chu tourism-a hmabak eng tak nei nia a hriat thu leh ruahmanna felfai zawk erawh an mamawh nia a hriat thu he hunah hian a sawi a ni.   

Mizoram sorkara Tourism Secretary Pu Lalremthanga, IAS chuan Mizoram Tourism dinhmun a sawi fiah bakah Telangana sorkarin zin mite hip nana a buatsaih Road Show chu hlawhtling hle niaa a ngaih thu a sawi bawk. 

Telangana Tourism Road Show-ah hian Telangana Sorkara Tourism Department hmalakna hrang hrang te, culture leh tradition, hmun hlui tlawh tur te,  Festival leh zinmite tana awlsamna siam sak thei tur thlen in leh tlawh tur hmun hrang hrangte tarlan a ni a. He Road Show hi India ram hmun hrang hrangah neih tawh niin hmar chhak state zingah chuan Sikkim, Assam, Meghalaya-ah te neih a ni tawh a ni. 

Telangana Road Show ah hian Mizoram Sawrkara Tourism Department lam hotute leh tour operator te an tel a. Road Show hi Telangana State Tourism Development Corporation (TSTDC) Managing Director Dr. Christina Z. Chongthu, IAS chuan a kaihruai a, Telangana State tourism chungchang a lema entirin a sawifiah nghal bawk a ni.