Vawiin khan Chief Secretary Pi L. Tochhong leh Assam Sawrkar Home Department aiawh te chuan Mizoram Assembly inthlanpui lo awm tur atana venhimna chungchungah meeting an nei a, inthlanpui atana ramri hrul a venhimna leh a kaihhnawih thil pawimawh hrang hrang zau takin an sawi ho bawk. Assam aiawh te hi Pu Mahananda Hazarika, Jt. Secretary leh DIG Pu Binod Kumar te an ni a, meeting-ah hian Pu Ashwani Kumar, CEO; Pu H. Lalengmawia, Jt. CEO; Home Department leh Mizoram Police hnuaia senior officer te; BSF aiawhte leh Assam Rifles aiawhte pawh an tel a ni.
Pi L. Tochhong chuan Mizoram leh a thenawm state te inkara boruak tha leh muanawm a awm chu lawmawm tiin Mizorama Inthlanpui lo awm tur chu fel leh fai taka neih a nih theih nan state thenawm te an pawimawh a, an puihna leh hemi chungchang a venhimna lama mamawh te chu an tihhlawhtlin ngei a beisei thu a sawi bawk.
Election Commission of India duh dan angin Mizoramah kumin kum tawpa Assembly Inthlanpui lo awm turah inpuahchahna pakhat atan Mizoram venhimna chungchang chu Mizoram leh a thenawm state pathum – Assam, Manipur leh Tripura te chu thlir ho turin a ti a, vawiina meeting hi chumi zulzui a neih a ni. Meeting- ah hian Tripura leh Manipur Home Department te pawh beisei an ni a, amaherawhchu Tripura Home Secretary chu tul dang a neih avangin a tel thei lova, Manipur lam chu flight lamah harsatna an neih avangin an lo thleng thei lo. Tripura Sawrkar chuan Mizorama inthlanpui lo awm tura venhimna chungchangah Mizoram mamawh leh tul dangte puih an huam thu ziakin CEO Mizoram chu an hriattir a ni.
Meeting-ah hian ramri hrula District thuneitute – DC leh SP theuh te chu state dang an thenawm District-a DC leh SP te chu venhimna chungchangah coordination meeting a tam thei ang ber neih tura hriattir nise an ti a. Hemi bakah hian Assam, Tripura leh Manipur ramri hrula ah te hian border patrolling pawh neih zing tura rawt a ni bawk.
