Vawiin a Mizoram lo thleng, Pu Praveen Prakash , Mission Director, Swachh Bharat Mission (Urban) chuan tlai dar 5:30 P.M. khan Chief Secretary Pu Lalmalsawma, IAS chu a pisa ah hmu in, Union Ministry of Urban Development hnuaia Mizorama Swachh Bharat Mission leh Atal Mission for Rejuvenation. and Urban Transformation (AMRUT) hmalakna dinhmun te sawiho a ni.

Chief Secretary chuan Swachh Bharat Mission hnuaia hmalakna pui ber pakhat Open Defecation Free (ODF) tura hna thawh chu chak taka kalpui a nih thu leh, a tluan zel chuan hun reiloteah chuan state pum chu ODF a inpuan theih beisei a nih thu a sawi a; chutihrual chuan inthiarna mumal leh changkang zawk (sanitary latrine) hmang tur chuan tui hnianghnar tawk tak mamawh a nih avangin hmun thenkhatah harsatna a awm theih thu leh, a sutkian dan tur ngaihtuah tel ni se tiin SBM Mission Director chu a hrilh a ni.

Pu Praveen Prakash chuan India hmarchhak state pariat zingah Mizoram chuan Open Defecation Free (ODF) hmalakna a kalpui tha lawr lak a ni, a ti a. AMRUT hnuaia Mizoram hmalakna te zawtin, bawlhhlawh sawngbawl dan, a bik takin biodegradable leh non biodegradable thliar hran dan mipuia inziritir chu he hmalakna hian a ngaihpawimawh thu a tarlang a. Heng biodegradable bawlhhlawhte hi leitha atana hman tangkai theih zel a nih avangin chumi kawngah chuan ngaihtuahna sen tel theih ni se, a ti bawk. SBM (U) Mission Director chuan hmalakna chak zawk a awm theih nan tunah India rama AMRUT city/town 500 bak khawpui dang la awm engemaw zat chu he hmalakna hnuaiah hian telh ve an nih theih nan ruahmanna siam mek a nih thu te a tarlang bawk.

He inkawmna hunah hian UD&PA Secretary Dr. C. Vanlalramsanga, IES leh UD&PA Department officer dangte an tel a ni.