Parliamentary Secretary for Finance, Planning, etc. Pu K.S. Thanga, Aizawl South-III bialtu MLA chuan nimin (12.4.2017) zing khan Falkawna tlawmngai pawl hruaitute leh khawtlang hruaitute kawmna neiin, Falkawn khuaa sawrkar hmalakna hrang hrangte a sawipui a. Heng hmasawn hna te hi a hlawhtlin theih nan a chhawrtu tur mipuite tawiawmna a pawimawh thu a tarlang bawk.

Pu KS Thanga chuan Falkawn khawtlang tan sawrkar in department. hrang hrang kaltlanga hmasawnna thawh mek te  leh ruahmanna lian tak tak an la neih mek te sawiin, Falkawn chu State Referral Hospital leh Mizoram College of Nursing te thuthmun a nih bakah hun reilo te ah Medical College pawh dun tum a nih avangin a pawimawh chho hle dawn a ni tiin, khawtlang mipui te pawh rilru inhawng taka he hmasawnna lo lut mek hi lo hmachhawn turin a chah a ni.

State Referral Hospital Falkawn chungchang bikah sawrkar hmalak mek na te tarlangin, tun dinhmunah hian Referral Hospital tih changtlunna turin NEDP atangin 28 crore dah a nih hu a sawi a. Hemi hmang hian kawng hrang hrangah hmalak mek niin, Power & Electricity-ah 7 crore dah a ni a,132 kv Sub Station Melriat a 5 MVA, 33/11kv transformer thar pahnih (2) dah tur atang hian 11kv hmangin Referral Hospital tan bik power supply pek tur a ni, a ti. State Referral Hospital-ah hian Distribution Transformer thar panga (5) dah tur a ni bawk a, hei bakah hian emergency backup (solar power) Hospital building-ah 50kw leh Administrative building-ah 50 kw dah bawk tur ani. Hei hian Referral Hospital mai bakah Falkawn leh a chhehvel khua te tun aia hnianghnar zawk in eng a pe thei dawn a. ICU la function lo pawh a rang thei ang bera function tura hmalak a nih thu leh, CT Scan leh MRI khawl pawh hun reilo te ah dah fel tum a nih thu Parliamentary Secretary hian a sawi a. PWD lam atangin Falkawn khawchhung kawng (internal road) siamthat na turin Hmuifang division-in estimate leh a tul angte buaipui in, tunah hian hna thawh tan tep a ni tawh a nih thu leh, UD&PA hnuai atangin Referral Hospital bul ah khualbuk sak na tur nuai 55 dah fel a, hna tan mai tura inruahman mek a nih thu a sawi
bawk.