Nimin tlai khan Chief Minister Pu Lal Thanhawla chu a chenna inah Pu Praveen Prakash, Mission Director, Swacch Bharat Mission chuan hmuin Swacch Bharat Mission hnuaia Mizoram dinhmun, hmalakna leh hmachhawp te a sawipui a ni.

Chief Minister Pu Lal Thanhawla chuan faina leh thianghlimna chu Sawrkar ngaihpawimawh berte a ni tiin hemi kawngah hian Mizoram chu Model state ni turin leh Mizorama khawpui leh thingtlang te chu chenna fai berte 'Cleanest Habitation' a nih theih nan Department hrang hrangte tangkhawmin theihtawp chhuah mek a nih thu a sawi a. Tunhnaiah Champhai District chu pawna daileng awmlohna District 'Open Defecation Free District' a puan a ni a, District dangte pawh hun reilotea ODF a puan beisei a ni a ti. Mizoramin Swacch Bharat Mission a awm hmaa  faina leh thianghlimna kawnga Clean Aizawl leh ruahmanna dang te a lo kalpui tawh thu hrilhin hei hian nasa takin min pui a, tunah SBM a chhunzawmna hian min tiphuisui zel a ni, a ti.

Pu Praveen Prakash chuan Population a tlem avangin Mizoram chu faina leh thianghlimna kawnga hmahruaitu a ni thei nia a rinthu sawiin bawlhlawh sawngbawlna kawngah tawih thei leh tawih thei lova thliar hran hmasak a tul tawh thu leh hei hi Aizawl ah pawh kalpui turin hma lak a tul a ti a. Heng bawlhlawh atanga leitha siam turin leh chumi chu lei turin fertiliser company  Ministry in a thawhpui mek a, heng leitha te hi a hmunah ngei Company ten an lei thei a ni, a ti a. Swacch Bharat Mission hnuaia ruahmanna hrang hrang te an sawiho a chak zawka hmalak theih dan te an sawi bawk a ni.