Nimin khan Chief Minister Pu Lal Thanhawla chuan Sawrkar Laipuia Ministry of Textiles ruahmanna hnuaia North Eastern Region Textiles Promotion Scheme (NERTPS) kaltlanga Industrial Growth Centre (IGC) Luangmual a sak, thawmhnaw siamna leh thuina hmunpui 'Apparel and Garment Making Centre' a tlawh a, he Centre enkawl tura thlan ‘Operating Agency’ Vakiria Computerised Embroidery ten hnathawh an tanna ‘Commencement of Operation’ puala inkhawm tawite a hmuna an buatsaih chu a hmanpui nghal a ni.

Chief Minister Pu Lal Thanhawla chuan Apparel and Garment Making Centre ang thil siam chhuahna leh dehchhuahna ruhrel (manufacturing infrastructure) Mizoramin a nei chu thil ropui leh ram tana hmasawnna pawimawh tak a nih thu te, tunlai khawl changkang tak tak hmanga state dang atanga lakluh ngai lova tualchhung mite ngeiin Mizoram mamawh thenkhat an phuhru tur chu thil lawmawm tak anih thu te leh Operating Agency ni tura thlan Vakiria Computersied Embriodery ten hnathawh an tan thei chu thil chhenfakawm tak a nih thu te a sawi a. A enkawltu tura thlan Vakiria Computerised Embroidery neitu Pi Lalsangzeli leh a thawhpui, a unnaute leh helai hmuna hnathawkte chu an hlawhtlin chhuah ngei nan duhsakna hlanin a quality tha leh man manhla thil siam turin a chah a. He hmun kaltlanga Mizo thalai 100 chuangin eizawnna an hmu leh helai hmuna themthiam zirna Skill Development Centre kaltlanga thalai ten eizawnna kawng an hmuh tur te chu thil lawmawm leh chhuantlak tak nia a ngaih thu te a sawi a. Tunhnaiah Sawrkar Laipuiin Hmarchhak ah Make in India ngaipawhmawha hetiang Centre a din te hi thil tha leh rotling a ni tih sawiin tangkai thei ang bera he ruahmanna hi kan chhawr a pawimawh a ni, a ti.

Chief Minister hian a thusawi ah Ringtu kan nihna angin eng hna pawh thawk ila rinawmna, dikna, taimakna leh Pathian tihna nung nen a hma kan laka kan thawh a pawimawh a, kan theih na te a in chen lo mai thei, mahse chuti chungin midangte tan malsawmna kan nih a pawimawh a, chutiang tura kan ngaihtuahna leh rilru kan siam a ngai a ni, a ti. Kan ram tana kan mawhphurna leh neitu kan nihna te hi a inchen tlang vek a, neitu rilru pua kan hna theuh kan thawh a tul a, a chhelai siamtha turin kan zavaiin hi koh kan nih tih kan hriatnawm fo a pawimawh a ni, a ti a. Ringtu kan nihna hi kan hman rim a tul a, Ringtu kan nihna zawn atangin kawng hrang hrangah ngaihtuah tur tam tak kan nei a ni, a ti bawk.

Kut hnathawh chu khawvela hna zawhawm leh khawi ramah pawh ngaihsan a nih thu te sawiin puantah leh handloom te hi hmeichhe thawh tur emaw tia dah lova, tharum nei tha zawk mipa ten heng hna hi tlawma la lova thawhna chang kan hriat te hi hmasawnna zel nia a hriat thu a sawi a. Sawrkar hna a van tawh avangin Mizoram tan themthiamna hrang hrang Skill Development leh mahni kea din a eizawnna kawng siam Entrepreneurship te hi Mizoram tan a pawimawh hle a, hemi lamah hian Sawrkarin a theih ang ang leh a phak tawk anga hmalakna a nei mek tih a sawi. Sakhaw zalenna ram India anga Krismas Ni chu Good Governance Day hman leh tunhnaia Good Friday chu Digidhan Mela Ni a hman rawtna awm te hi Kristian te nek chepnaa a ngaih theih nia a hriat thu a sawi lang bawk.

Managing Director ZIDCO nihna lo chelh tawh Pu Lalhmachhuana'n  Apparel & Garment Making Centre din a nih theih nana kawng zawh chhoh dan leh hmalak dan te sawiin Project hi a tobul atanga tun thlenga hnathawh dante a sawi bawk a ni. Thusawitu dang Pu Zothan Khuma, Secretary, Commerce & Industries leh Managing Director ZIDCO ni bawk chuan Operating Agency thlan a nih dante sawiin Department-in Vakiria Computerised Embroidery chungah beiseina sang tak a nei tih a sawi. Pi Lalsangzeli, Director, Vakiria Computerised Embroidery chuan an pawl chanchin  sawiin hmalak an tum dan te a report sawi ah a tarlang a. Pu Lalrobiaka, MLA, Chairman ZIDCO pawhin thu sawina neiin lawmthu sawiin programme a khar a ni.

Industrial Growth Centre, Luangmuala sak Apparel & Garment Making Centre hi NERTPS ruahmanna hnuaia sak niin a sakna sum za a za hi Ministry of Textiles tum vek a ni a, he project hi cheng nuai 1818 man hu a ni a. A sakna ram square metre 20,000 velah zau hi Mizoram Sawrkar pek a ni. He Centre ah hian Unit 3 a awm a, Unit 1 leh Unit 2 te hi production and manufacturing facility niin Unit 3 hi Skill Development Training-na hmun tur a ni a. Centre-a Unit  building pathum te hi cheng nuai 813.60 senga NBCC sak a niin heng Unit-a khawl hrang hrang man ah cheng nuai 612.55 sen a ni a, cheng nuai 392.4 hi capacity building atan PIA kutah dah a ni.

Unit-1 leh Unit 2 ah te hian khawl hrang hrang khawvel huap pawh a changkang ber ber puanthuina leh puandehna khawl 121 ve ve dah niin Unit 3 ah hian khawl 78 dah a ni. Unit 1 hi Vakiria Computerised Embroidery, Zarkawt enkawl tur niin tunah hian thawktu 98 vel nen bultanin hma an la mek a. Thawktu zinga  adminstrative staff thenkhat hi National Institute of Fashion Techology (NIFT) chhuak te leh MBA thiamna nei te pawh an awm a ni. Unit 2 hi Computerised Embroidery, Millenium Centre enkawl tura ruahmanna siam a ni a.  Unit 3, Skill Development Training Centre hi Vocational School of Education (VSE) enkawl tura tih niin Training Centre hi National Skill Development Corporation ruahmanna zulzuiin National Skill Qualification Framework (NSQF) mila kalpui tur a ni a. A hmasa ber atan chuan Self Employed Tailor, Sewing Machine Operator (Industrial) leh Hand Embroiderer Trade te hi tan a ni ang.

Apparel & Garment Making Centre sakna lungphum hi July ni 15, 2015 khan Union Minister for Textiles Pu Santosh Kumar Gangwar'n a phumin sak zawh leh khawl te bun a nih hnuin amah vekin nikum June  ni 6 khan a rawn hawng a ni.

Implementing Agency ah ZIDCO hman niin nasa takin he project hlawhtlin nan leh a hun taka sak zawh a nih theih nan an thawk a ni.