Kum tinin 'Fire Service Week' hi India ram puma 14th - 20th April chhungin hman thin a ni a. Ni 14th April bik hi Fire Service Day / Martyrs Day atan hman a ni bawk a. Ramchhung hmun dangte ang bawkin kumin hian Mizoram sorkar ruahmanna angin Department / Office hrang hrang ah he 'Fire Service Week' puala thuchah chhiar chhuah a ni a. Hei bakah hian Car Flag siam in Fire Stations telephone number te tarlan a ni a. All India Radio, Aizawl leh Doordarshan Kendra, Aizawl atangin he Week pual hian thuchah leh Discussion te tihchhuah a ni bawk.
Martyrs Day hi Aizawl-ah vawiin khan Fire & Emergency Services Hqrs, Hunthar Veng-ah zing dar 7:00 khan hman a ni a. Aizawl pawn lama Fire Station te chuan vawiin vek zing dar 9:00 ah anmahni hmun theuhah an hmang thung a ni. He martarte sunna hunah hian nikum 2016 chhungah kangthelhnaa thi mi 2 te hming chhiar chhuakin anmahni sun nan minute 1 ngawi renga dingin hun hman a ni a. Chungte chu :
1. Leading Fireman K. Pughazhendi,
Puducherry Fire Service Department
2. Fireman A. Marikarra,
Tamil Nadu Fire & Rescue Services te an ni.
Kum 1944 April ni 14 khan indo lawng lian tak 'Fort Stikine' an tih chu Mumbai lawng chawlhna hmun a lo thleng a. He lawng rapthlak leh bomb lam chi tam tak phur hi a kang ta vak mai a. He kangmei chhuak rapthlak takah hian Bombay Fire Brigade mi 66 leh Bombay Salvage Corps mi 11 kangthelh tute chuan an nunna an chan phah a. Heng mitthite hriatrengna atan hian Fire Service Day hi April ni 14 ah hian hman a ni ta a. April ni 14-20 chhung hi Fire Service chi hrang hrang te chuan kangmei laka himna tur zirtirna an nei thin a ni.
Mei tel lo hian mihring a awm theih loh a, mitin tana pawimawh leh tangkai tak a ni. Kangmei erawh mihringte tan chhiatna, beidawnna leh tahna, piansualna leh thihna hial thlen a, kan ro hlu in leh lote meivapa chantirtu a ni. Kumin 2017 Fire Service Week thupui atan India sorkar chuan 'Firemen-Your partner for saving life and property' (Kangtheltu-I thian, I bungrua leh nunna venpuitu che) tih a rawn thlang a ni.
