April Ni 15, 2017 (Inrinni) khan Damparengpui Community Hall-ah Boisu Festival 2017 hman a ni a. Mamit District Bawrhsap Pi Lalbiaksangi'n khuallian niin a hmanpui.

Khuallian chuan kalkhawmte chu Boisu Festival chibai bukin Reang (Bru) te chu hmasawnna kawnga thang zel turin a chah a. Bank kaltlanga pawisa khawlkhawm nachang hre tur leh zirna kawngah pawh ziak leh chhiar thiam lo tam tak kan la awm chu pawi a tih thu sawiin tunlaiah chuan hming ziak thiam lova kutzungpui nem ringawt chu a him tawk lova, Bank leh thil dang dangah hming ziah zel a tul tawh avangin kan la thiam lo a nih pawhin mahni hming ziah tal chu kan zir tur a ni a ti a. Naupang sikul kal rual sikul kal lote pawh zirna pawimawhzia hria a, nu leh pa te'n Sikul luhtir ngei turin a chah a. Hriselna kawngah pawh hmasawn zel tura chahin tui thianghlim chauh in tur leh ramngaw leh tuihna te pawh humhalh turin a chah a ni.

He hunah hian Pu Lalropuia Hmar, EE PHED, Mamit chuan thu sawiin inthiarna tha neih a pawimawhzia a sawi a. Pi Lalnunthari, DEO Mamit pawhin ziak leh chhiar thiam pawimawhna hrang hrang a sawi bakah Pi Lalmalsawmi Varte, Manager SBI, Mamit Branch chuan Bank kaltlanga sum khawlkhawm pawimawhna chungchang a sawi bawk.

Boisu Festival 2017-ah hian zai leh lama intihhlimna hrang hrang an neih bakah Custom Parade, Traditional Sport bakah special items hrang hrang an entir a ni.