Vawiin khan Assam sawrkara Addl. Chief Secretary VB Pyarelal chuan Chief Secretary Pu Lalmalsawma chu a office-ah hmuin Guwahati khawpuia buatsaih tur Festival of Faith chungchang a sawipui.

Pu Pyarelal chuan May thla tawp lama neih tur Festival of Faith hi Assam sawrkar leh India Foundation tangkawpin a buatsaih tur niin hmarchhak state-te pual bika ruahman a ni, a ti a. He Festival-ah hian hmarchhak state tinte pualin pavilion siam a ni dawn a, hetah hian hnam hrang hrangte nunphung leh hnamzia tarlang thei tur thil chi hrang hrang phochhuah a ni dawn tiin he huna tel ngei tur hian Mizoram a sawm a ni.

Assam Addl. Chief Secretary hi April ni 14 khan Aizawl lo thlengin Art & Culture Director Pu Hmingthanzuala nen festival chungchang hi an lo sawi dun tawh a. Naktuk hian Aizawl chhuahsanin Guwahati a pan ang. Vawiin meeting-ah hian Chief Secretary bakah Art & Culture Director leh Joint Director-te an tel a ni.

Assam sawrkar hian Festival of Faith hi an buatsaih vawikhatna tur niin Assam Agriculture University ground-ah lian tham taka neih an tum a. An State chhunga hnam hrang hrangte bakah North East state tina hnam leh tawng hrang neite huam kim an tum hle a ni.