Vawiin zing dar 10 khan Union Minister for Human Resource Development, Pu Prakash Javadekar chuan Rashtriya Uchchatar Shiksha Abhiyan (RUSA) hnuaia State hrang hranga Project zawh tawh 15 te chu Video Conferencing hmangin India Habitat Centre, New Delhi atangin a hawng a. Heng project zingah hian “M.Ed Classrooms Building thar” Institute of Advanced Study in Education (IASE), Republic Veng, Aizawl ami chu telin Union Minister chuan a hawng nghal a ni.
Human Resource Minister Pu Prakash Javadekar chuan Delhi atanga India ram state hrang hranga RUSA project te hawn a ni thei chu lawmawm a tih thu sawiin RUSA in a tum ber chu zirna sang zawk tihchangtlun leh tih hmasawn zel anih thu te a sawi a ni.
India Habitat Centre Delhi-a hawnna inkhawmah hian Pu R. Romawia, Higher & Technical Education Minister, State Higher Education Council Chairman ni bawk leh Pu Benjamina Commissioner Secretary, Higher & Technical Education Department te chu an tel a. RUSA beneficiary institutions India ram hmun hrang hrang ah he programme hi internet kaltlangin an thlir bawk a ni.
M.Ed Classrooms Building thar Republic Veng atang hian video conferencing hmangin Pu H. Zothangliana Parliamentary Secretary (Higher & Technical Education), State Higher Education Council Vice-Chairman ni bawk , Pu R.Vanlalvena MLA leh Higher & Technical Education Department hotuten an tel pui a. Parliamentary Secretary chuan a hmunah hian Building thar chu a hawng ve leh bawk a ni.
