Vawiin chawhnu khan Study Tour a kal tur Goverment Higher Secondary School hrang hrang atanga Zirlai 50 thlanchhuah  leh anmahni hruaitu  Zirtirtu 5 te chu CH. Chhunga Bus Terminal, Thuampui atangin Pu K. Laldingliana MCS, Additional Director, School Education Department chuan a vai liam. 

He Study Tour- hi Higher Secondary School Lecturers’ Association of Mizoram (HISSLAM) leh Career & Talented C.T Group of Institute Jalandhar (Punjab University Affiliated) te’n February ni 13 a thawhhona thuthlung an siam bawhzuina atana buatsaih a ni a. Thawhhona thuthlung  an ziahah hian Study Tour mai bakah, Carrer guidance leh Zirtirtute tan Refreshers cum Orientation Course Training buatsaih te pawh a tel a ni. 

Ruahman dan chuan Study Tour team te hi April  ni 20-hian Jalandhar University (Punjab) an thleng anga, ni thum chhung chamin Punjab State chhung hmun pawimawh tak tak heng; Amritsar - a  Jallian Walla Bagh Massacre hriat rengna hmun leh Golden Temple te an tlawh ang a. Zirlai te hriat tur pawimawh inhrilh hriatna leh zirna atana hmun tangkai te tlawhin, Mizo Cultural Dance Cheraw leh Chheih Lam te an entir bawk ang. Hemi zawh hian Mizoram panin an let leh dawn a ni.