Vawiin chawhnu khan Chief Secretary, Pu Lalmalsawma hovin State Level Screening Committee (SLSC) chuan Border Area Development Programme (BADP) Annual Action Plan chungchang ngaihtuahin Secretariat Conference Hall-ah meeting an nei.
Meeting-ah hian BADP hnuaia kum 2017-18 chhunga Rural Development (RD) Block 16 tan sum ruahman hrang hrang te chu sawiho a nih hnuah pawm tlan a ni a. Block tin te sum ruahman dan hi international border line, mipui tam zawng leh ram leilung a zira siam a ni. BADP hnuaia hnathawh hrang hrang vil tu Monitoring Cell tana sum ruahman chu pawm niin, SLSC Chairman-in tul anga a hman theih tur BADP tana sum ruahman (2.5% of total allocation aia tam lo) dah hran tura pawm tlan a ni bawk. Model Village chungchang sawiho a ni a, Mizoram atangin Khawbung khua thlan a ni. He model village hi international border atanga hlat zawng, ziak leh chhiar thiam zat, mipui tam zawng leh tehna dangte atanga thlan; kawng tin renga hmasawn tura ruahman a ni.
Border Area Development Programme (BADP) hi kum 2015-2016 thleng khan Centrally funded Programme niin, tun dinhmunah hian Core Centrally Sponsored Scheme (CSS) hnuaiah dah a ni a. Sawrkar laipui leh state sawrkarin 90:10 anga in tum sem tura tih a ni.
He meeting-ah hian Home Department, Finance Department, Rural Development (RD) , H&FW, Sports & Youth Services, PHED, Border Security Force (BSF ), Assam Rifles leh PUSHPAK lama hotu te an tel a ni.
