Mizoram tlawha lo zin Indian High Commissioner to Bangladesh Pankaj Saran chuan vawiin chhun khan Chief Secretary Pi L Tochhong chu a office chamber-ah hmuin ramria insumdawn tawnna leh Mizoram thil pawimawh hrang hrang a sawipui.

Indian High Commissioner chuan Bangladesh ramri dep State hrang hrang te tlawhchhuah vek a tum thu leh Mizoram sum leh pai dinhmun, khawtlang nun leh thil hrang hrang hriat tuma lo zin a nih thu te sawiin Chief Secretary hnenah hian Mizoram sum leh pai dinhmun te a zawt a. Mizoram chu State ralmuang leh nuam tak, sik leh sa nei tha, Tourism, Agriculture, Floriculture, Horticulture leh Food Processing lamah pawh hma eng thui tak nei nia a hriat thu te a hrilh a, mipui mimir nunphung pawh changkang leh khawsak nuam tak nia a hmuh thu te a hrilh a ni.

A thil hriat duh hrang hrang te chhang hian Chief Secretary Pi L Tochhong chuan Mizoram chu Union Territory hnuaia an awm chhungin sorkar laipui atanga duhsakna dawngin sum leh pai leh hmasawnna tinrengah sorkar zar a zo thin a, chu chuan mahnia ro in rel State an nih hnuah pawh nghawng neiin sum leh pai dehchhuah leh thahnemngaihna tak tak an tlakchham phah zawk hial nia a hriat thu a hrilh a ni. Mizo mipui mimir nunphung chu tha thawkhat hlea a hriat thu leh khawtlanga mirethei leh harsa zual te chu society-in a dawmkan mai dan te a hrilh a, YMA hmalakna ropui tak a tarlang a ni. Rethei dawmkan nana sorkar hmalakna lianber NLUP chungchang pawh sawiin he policy hnuaiah hian mi tam takin lei rem an rap tan mek a ni, a ti bawk.

Chief Secretary hian ngaihhrui nan ram palai hnenah hian puan bahchi a pe a ni.

Sorkar laipui mipawimawh lo zin hian Mizoram DGP Alok Kumar Verma pawh a office-ah hmu in venhimna chungchang thil pawimawh chi hrang hrang an sawidun bawk.

Bangladesh-a India sorkar palai hian vawiin chhun khan Aizawl a chhuahsan leh ta a ni.