Vawiin khan Indian High Commissioner to Bangladesh Pu Pankaj Saran chuan Trade &Commerce Minister Pu Lalrinliana Sailo chu a office chamber-ah hmuin inpawh takin thu an sawi dun a ni.
Minister Pu Lalrinliana Sailo chuan Mizoram kaltlanga India-Bangladesh insumdawn tawnna changtlung zawka kalpui a nih theihna tura hma an lo lak tawh dan tlangpui a hrilh a. Kawrpuichhuaha Integrated Check Post (ICP) sakna tur atana ram mamawh bigha 65 a zau chu Ministry of Home Affairs Secretary hminga Land Lease Certificate thehluh a nih tawh thu te, MHA Secretary in a hmun tur pawh kumin April thlaa a tlawh tawh thu leh MHA remtihna nghah mek a nih thu a sawi a. Thekka luia dawh tur RCC double lane bridge siamna atan DPR buatsaih mek a nih thu leh hei hian hmasang ata tawh insumdawn tawnna hmun Thega Bazar (Thegamugh)a pawh tur thu te, Thekkamukh leh Chittagong Hill Tracts headquarters Rangamati inkalpawhna tur truck tlan theihna kawngpui leh Chhotokorina kaltlanga Thegamukh leh Barkal Upazila Hqrs. inkalpawhna kawngpui sial tura Bangladesh sorkar ngen tul an tih thu te, Border haat pali sakna tur Ministry of Commerce & Industry leh Ministry of DONER ah te thehluh a nih thu te bakah Thegamukh-a Land Custom Station tuaithar leh tura Bangladesh sorkar ngen te leh Thekka luia lawngchawlhna siam chung changa an hmalakna te Minister hian a sawi a ni.
Heng an thil thlen zawng zawng hi Indian High Commissioner chuan sorkar laipuia a kaihhnawih Ministry hrang hrangah te leh Bangladesh sorkarah pawh theihtawp chhuaha a nawrzui tur thu a sawi a. Mizoram Trade and Commerce Minister-in luidung atanga Chittagong thleng tlawha zin a rawt pawh chhangin Dhaka khawpui rawn tlawh hmasaa chutatanga Chittagong leh Mizoram ri dep thlenga zinpui chu thil remchang zawk nia a ngaih thu a hrilh a ni. Pu Pankaj Saran chuan Mizoram Chamber of Commerce hruaitute nen tukthuan kilho a titi na hun tha tak an neih thu leh anmahni pawh Bangladesh-a zin tura a sawm thu Pu Lalrinliana Sailo hi a hrilh bawk.
Pu Lalrinliana Sailo hian India palai hi ngaihhrui nan khumbeu leh khiangkawi ipte a pe a ni.
