Zan khat riaka Mizoram rawn tlawha lo zin Indian High Commissioner to Bangladesh Pankaj Saran chuan tukin zing khan Mizoram Governor Vakkom Purushothaman chu a chenna in Raj Bhavan-ah hmuin Mizoram leh Bangladesh inkar inlaichinna leh insumdawn tawnna bakah thil pawimawh chi hrang hrang huamzau takin an sawi dun.

Mizoram Governor chuan Mizoram chanchin tlangpui hrilhin kum 20 zet rambuaina atanga remna leh muanna tluantling tak a awm chhoh dan te, chumi atanga hmasawnna kawng hrang hrang chak taka kalpui a nih dante, Bangladesh leh Mizoram inkarah pawh tunhma atanga ramriah insumdawn tawnna a awm dan te a sawi a.Governor chuan tun dinhmuna a thil ngaih pawimawh tarlangin ramria insumdawn tawnna hi uluk leh dan hnuaia kalpui a tul thu leh dan loa sumdawnna, ralthuam leh ruihhlo chi hrang hrang tawlhruk a awm theih dan te hrilhin Border Trade changtlung tak a tul a ni, a ti a. Mizoram chu sik leh sa nuam tak niin tlangram chhengchhe tak a nih avang erawh chuan inkalpawhna kawngpui sial chu hna hautak leh thil harsa a nih thin dan Governor chuan a sawi bawk.

High Commissioner Pankaj Saran chuan Mizoram a rawn tlawh vawikhatnaah hian State ralmuang leh mipui dinhmun pawh changkang tak, thalaite pawh lehkhathiam leh hawizau tak nia a hmuh thu te a sawi a. Bangladesh nena inlaichinna pawh tunhma zawng aia a that tawh thu leh ramria insumdawn tawnnaah erawh chuan Bangladesh sorkar an tuanfum deuh nia a ngaih thu Governor hi a hrilh a, hei hi chak leh zuala Bangladesh sorkar pawh nawr tura hma lak a tum dan te a sawi a ni.