Social Welfare Department hnuaia ICPS Aizawl District Child Protection Society chuan May ni 15 atanga ni 18 chhung khan Aizawl hmarlam khaw hrang hrang 28-ah 'Naupangte Dikna Chanvo Humhim' Awareness Campaign an hmang a. Aizawl District Child Protection Society hian Hmarlam tlang dung an tlawh khuaah hian danin a phut angin, kum tlinglo te dikna chanvo humhim turin Village Level Committee leh Block Level Committee an din nghal a, tunkar hian a puitlin zelna turin hma an la zui nghal bawk ang.

Awareness Campaign hmanpuitu District Child Protection Society Aizawl te hian Khawruhlian-ah programme hi an hmanpui hmasa ber a, he khua leh a chhehvel khaw hrang hrang te an kal tha hle. Khawruhlian zawhah hian Darlawn leh a chhehvel khuaah te hun hman leh a ni a, khawchhe tak karah NGO hrang hrang an sawm te an kal that avangin lawmthu an sawi a ni. Darlawn-a hun hman zawhah hian Zohmun khua leh a chhehvel khua te tan hun hman leh a ni a, Sakawrdai Community Hall-ah Sakawrdai leh a chhehvel khua te tan hun hman zawh anih hnuin ni 18.5.2013 (Inrinni) kalta khan Aizawl District Child Protection Society staff te hian Aizawl an rawn pan leh a ni.

He Awareness Campaign neihnaah hian Aizawl hmar tlangdunga NGO hrang hrang MHIP, MUP, YMA leh VC te sawm an ni a. Aizawl District Child Protection Society hian Aizawl veng hrang hrang-ah Awareness Programme hi an hmang reng bawk a ni.

Integrated Child Protection Scheme hi Ministry of Women and Child Development hnuaia ruahman a ni a, Mizoramah chuan Social Welfare Department enkawlna hnuaiah a awm. ICPS hi naupang kum 18 hnuailam te tana thawktu niin an dikna chanvo humhim sak te, enkawl ngai enkawl te leh siamthat ngai te siamthat kawnga thuneitu leh hmalatu an ni.