Ni 18.5.2013 (Inrinni) kalta khan Thingsulthliah atanga HSCL leh HSSLC pass tha zirlaite lawmpuina hun hman a ni a, Home Minister leh Bialtu MLA nibawk Pu R.Lalzirliana chuan he hun hi Thingsulthliah Community Hall-ah a hmanpui a ni.
Khuallian Pu R.Lalzirliana chuan Thingsulthliah zirlaiten result tha tak an neihna chhan chu khawtlang hruaitute, nu leh pa, zirtirtu leh zirlai te tanrual vang a ni, tiin Bialtu MLA a nihna angin thinlung takin ka lawmpui a ni, a ti. Zirlaite chu an kal zelna kawnga duhsakna hlanin Minister chuan Pathian tihtu ringtute tan chuan eng kawngah pawh, khawi hmunah pawh hlawhtlinna leh mizahawm nihna in a umzui zel thin tih a sawi. Private school-a thawkten hlawh tlem zawk nei mahse theihtawp an chhuah thin avangin result tha tak tak an nei thin a, an inpekna a fakawm hle a ni, a ti bawk. Zirlai leh thalaite hi Zoram nghahfak an ni tih hre reng tura chahin Pu R.Lalzirliana chuan hun lo kal zelah pawh Mizo nun zemawi theihnghilh lo turin kalkhawmte a chah bawk a ni.
Thingsulthliah khawchhuak zirlai ti tha te zingah HSLC Result pumpuia 10-na Vanlalramthari Ralte leh HSSLC (Arts) pumpuia 3-na Malsawmdawngzela leh 9-na PT Malsawmkima te pawh an tel a ni. Hemi ni hian zirlai HSLC leh HSSLC pass mi 61 te hnenah Minister hian lawmpuina a hlan a, Thingsulthliah PTA hnenah lawmpuina Rs.10,000/- a pe bawk a ni.
