National Institute for Empowerment of Persons with Multiple Disabilities (NIEPMD) , Chennai leh Social Welfare Department, Mizoram buatsaihin vawiin khan SCERT Auditorium-ah pianphunga rualbanlo te tana Disability Certificate pek dan tur leh a kaihhnawih Master Trainers ten an zir a. Social Welfare Minister Pu PC Lalthanliana chu khuallian niin ni hnih awh tur workshop hi a hawng a ni.

Pu PC Lalthanliana chuan India sorkarin pianphunga rualbanlote tan hamthatna chi hrang hrang a buatsaih sak a, 1995 a Persons with Disabilities (PWD) Act a siam hnu atang phei kha chuan pianphunga rualbanlo te mahni kea an din ve theihna tur kawng dapin an dikna chanvo humhalhna tur leh thildang tam tak a siam sak a ni, a ti. Mizoram sorkar pawhin State Level Co-Ordination Committee leh State Level Executive Committee for Persons with Disabilities Co-ordination te dinin sorkar laipuiin rualbanlote tana hamthatna a siamsak hi an hmuh ve ngei theihna turin hma a la a, tun dinhmunah mi 7894 in Disability Certificate hi an dawng tawh a ni, a ti bawk. Social Welfare Minister chuan rualbanlo te tan sorkar hna hrang hrangah za zela pathum (3%) hauhsak an nih theih nan hma lak mek a ni tih sawiin tun dinhmunah mi 40 in sorkar hna an hmu tawh a, Mizoram Civil Service leh Mizoram Judicial Service a lut te pawh an awm tawh a ni, a ti.

Social Welfare Director Pi Vanlaldini kaihhruai Workshop hawnna inkhawmah hian Social Welfare Commissioner & Secretary, Dr Ranbir Singh leh Hospital, Medical & Education Director, Dr Lalrinliana Sailo bakah National Institute for Empowerment of Persons with Multiple Disabilities (NIEPMD), Chennai Director Pi Neeradha Chandramohan leh NIEPMD Associate Professor Dr MK Tomy te pawhin thu an sawi a. PWD Commissioner Pi B Sairengpuii pawhin he hun hi a hmanpui a ni.