District Child Protection Unit, Social Welfare Department leh LENS Mamit tangkawpin an buatsaih Child Protection Photography Competition result puanna neih a ni.

Dr Lalrinhlua, DCPO Mamit chuan naupangte dikna chanvo humhalhsakna kawngah midangte zirtir chhawng thei tur leh an dinhmun tarlang turin entir nei tha tak thlalak mamawh thin a nih thu a sawi a, chumi avang chuan LENS Mamit-te nen he competition hi buatsaih a nih thu a tarlang. Naupangte dikna leh chanvo humhalhna kawngah kan thawhho theihna apianga thawkho tur leh hetiang dinhmuna ding, tanpui ngai hria leh hmu chuan DCPU Office Mamit-ah hriattir thin turin a sawm bawk. Naupang a bika enkawl ngaite enhran bikna rilru pu kan la awm thin chu kan hmasawn lohna niin naupang dangte anga zalenna pek chu an nun khawchhuah nan kan tih theih a nih thu a sawi.

Pu P. Lalchunglura President LENS Mamit chuan he competition kalpui anih dan leh thlalak endik nana tehfung hman hrang hrangte a tarlang a, LENS Member-te an thawhpui na-ah DCPU, Mamit-te chungah lawmthu a sawi bawk.

He hun SIRD Auditorium a neih hi Tv KTC Lalrinchhana, Secretary LENS Mamit host niin Pu Lalchhandama, Asst Secretary LENS chuan lawmthu sawina a nei bawk.

Intihsiaknaah hian theme chi hrang hrang pathum (A-C) Naupang dikna chanvo, A bika naupang enkawl ngai leh Naupangte chunga dankalha chetna tihte hman niin DSLR Camera leh Mobile hmangin thlalak hi thehluh a ni a, Theme tinah hian Lawmman pakhatna atanga pathumna thleng siam anih bakah Consolation Price siam niin Mamit District chhung a mite tan intihsiakna hi buatsaih a ni. Theme A, DSLR camera-ah hian pakhatna Lalsawta, Chhippui, Kawnmawi a ni a, Mobile Camera ah  C.Lalramhnehzauvi, Mamit chuan lawmman pakhatna a la a ni. Theme B-ah DSLR Camera-ah Ngursangzela, Chhippui Kawnmawi chuan lawmman pakhatna lain, Mobile Camera-ah C. Lalrinhlui, Mamit chuan lawmman pakhatna a la bawk. Theme C-ah hian Mobile Camera-ah R. Vanlalduata, H/S Veng chuan lawmman pakhatna a la bawk.