UD&PA Department huaihawt in vawiin khan Diakkawn Branch YMA Hall ah faina kawnga zau zawka hmalak anih theihnan Kolasib Town area chhunga zirtirtu te tan Sanitation workshop neih a ni.

He huna khuallian Kolasib Bawrhsap Pu Zoengsanga chuan “Midang hmuloh laia bawlhlawh paih mai mai pawi ti lohna rilru pu kan awm chhung chuan hmasawn a har ang” tiin faina chungchang hi thinlung ah nghet taka tuh a ngai a, chumi tur chuan chhungkua leh sikul zirlai naupang ah bul tan a ngai ani a ti. Faina chungchangah zirtirtu te pawimawh thu sawiin naupangte ngaihsan ber chu zirtirtu te an ni a, naupangte thu ngaih pawimawh ber chu zirtirtu te thu a nih angin faina kawnga zirtirna dik an dawn chuan puitling thlenga an zawm ngei a rinawm a, chu chuan khawtlang nuna faina kawngah nasa takin a pui dawn ani a ti.

Bawrhsap chuan engkim mai hi Sawrkar kuta dah vek tur a nilo tiin neitu thinlung pu chunga mahni phak tawka hmalak theuh a ngaih thu a sawi a, mahni kawt kai leh kawngpui dung te tihfai a pawimawh, mahni inchhung, silhfen, taksa leh zirna hmun te pawh a fai tur ani tiin chu chuan zirna kawngah pawh zirna boruak hrisel zawk leh nuam zawk a thlen ngei ang a ti a, faina kawnga hmasawn turin nu leh pa te leh zirtirtu te hi an pawimawh hle ani a ti. Hemi bakah hian zirna kawngah tan lak a ngaih thu tarlangin a awmze hre mang lova in by-heart tir satliah mai lovin zirlai ten an zirlai chu a taka an nunpui theih nan zirtirna tha leh belhchian dawl (quality education) chu zirlai te thinlunga nghet taka tuh a pawimawh thu a sawi bawk.

Workshop hi Pi PC Zonuntluangi, DUDO in a kaihruai a, Pi R. Lalmuankimi, procurement Specialist, UD&PA chuan bawlhlawh tihtlem, sawngbawl, hman nawn/tangkai (recycyle/re-use) chungchang chu Power Point presentation hmangin ziritrna a pe a ni.