No.1554/2021-2022

Aizawl 26th July 2021: Vawiin chawhma khan Mizoram Legislative Assembly Speaker Pu Lalrinliana Sailo chuan CHILDLINE 1098 Awareness video clip chu Video Conference hmangin a tlangzarh.

Pu Lalrinliana Sailo, Speaker chuan video clip tlangzarh paha thu sawiin Child right issue hi thil pawimawh tak leh ram roreltute pawhin keimahni level theuha kan ngaih pawimawh tur a ni a ti a, tun dinhmunah Mizoramah ngei pawh naupang chhawmdawl leh ngaihsak ngai, harsatna tawk engemaw zat an awm tih sawiin chung naupangte tana biak pawh theiha Childline team kan nei chu lawmawm a tih thu a sawi. Speaker chuan he Childline 1098 hi Mizo mipuiten tangkai taka kan hman theuh a beisei thu a sawi a ni.

Dr. C. Lalsangzuala, Chairman, Mizoram State Commission for Protection of Child Rights chuan video clip siam a nih chhante sawiin ‘Child Protection Issues in Mizoram’ tih thupui hmangin Mizorama naupang venhim leh tanpui ngaite dinhmun leh buaipui an nih dan kalphungte a sawi bawk a ni.

CHILDINE 1098 hi Ministry of Women and Child Development hnuaia project pawimawh tak niin India ram hmun hrang hrangah hna a thawk a, Mizoramah chuan Centre for Peace and Development te hmalaknain kum 2011 atang khan Aizawl district-ah hnathawh tan a ni a, kum 2015-ah Mamit district-ah CHILDLINE 1098 hi hawn belh leh a ni. CHILDLINE 1098 in a tum ber chu naupang piang hlim atanga kum 18 la pumhlum lo te dikna chanvo humhalhsak niin naupang venhim leh tanpui ngaite tan darkar 24 chhung hna a thawk. CHILDLINE Aizawl hian kum 2020-2021 chhung khan naupang harsatna nei 474 a tanpui a, Covid-19 avanga ei leh bar tlachham chhungkaw 322 te hnenah ei leh in tur pein tanpuina an pe bawk a ni. Naupang tawhsual tawk leh eng kawng pawha harsatna neite chuan Phone No. 1098 ah emaw, 9774222275 ah emaw hian biakpawh theih reng a ni a, Video tlangzarh tak hi Childline Aizawl Youtube channel-ah en theih a ni

He programme hi Pu T. Lalnunsiama President, Centre for Peace and Development chuan kaihruaina hun a hmang a ni.