District Child Protection Office, District Legal Services Authority leh Project Himna SADAT Serchhip te buatsaihin Childrens Week 2019 lawmna hun vawiin atangin hman a ni a. Serchhip a Middle School leh High School naupangten hawnna kawngzawh neiin, he kawngzawh hi Serchhip District Bawrhsap Pi Sangchhin Chinzah chuan a vailiam a, he hunah hian zirlai ten zuk leh hmuam leh ruitheihthil that lohzia poster te an keng a ni.

Rally neih zawh hianah Serchhip Auditorium ah HAPPY CHILD-HOOD PREVENGTING FROM HIV/AIDS & DRUGS ABUSE Programme hman chhunzawm nghal a ni a, he hun hi Pi Lalsiampuii, DCPO Serchhip in a kaihruai a. Khuallian Pu R. Sathyasundaram, SP Serchhip chuan zirlai naupang kalkhawm te hmaah thusawiin, zu leh ruihtheihthil kaihhnawih chi hrang hrang laka filhlim tura fuihin, heng ruihlo tawlh rutute leh zuartute hremna dan hrang hrangte a sawi bakah, mihring hrisel leh mi puitling ni tura an nitin nunkawng uluk taka hmang turin a chah bawk.

Project Himna MADAT (Mizoram Against Drugs Alcohol Tobacco) atangin Dr. Zodinmawii, Medical Officer OST Serchhip chuan zirlai naupang te chu zuk leh hmuam leh ruitheihthil that lohna chi hrang hrang a lem nena entirin a zirtir a. Pi Lucy Lalremruati Chhangte, Chief Functionary, Gan Sabra Society Aizawl hnen atangin HIV/AIDS laka naupangte an him theihna tur leh inven dan turte bakah dan hnuaia naupangte venhimna chungchang ngaihthlak a ni bawk.

He hunah hian Serchhip khawpui chhunga zirna in hrang hranga zirlai naupangte, Serchhip District Legal Services Authority leh HIMNA-SADAT Serchhip a thawktute telin, naktuk hian a hmun ngai ah vek hian ‘Our Children-Our Future – Role of Parents & Teachers’ tih thupuia hmangin Programme hman leh tura ruahman a ni bawk.