Tunkar ningani, November ni 14-a 'Naupangte Ni (Children's Day)' lo thleng tur pual leh Children's Week 2019 hawn nan tukin zingkar khan Lawngtlai District Child Protection Unit (DCPU) chuan mini marathon intlansiak an buatsaih.

Mini marathon hi category li (4) - kum 10-14 hmeichhia leh mipa, leh, kum 15-17 hmeichhia leh mipa-ah te then a ni a. Lawngtlai chhim lam daia 71 RCC hmun atanga tlan tanin, Lawngtlai Bazar Venga Areopagy thleng an tlan a ni.

An tlan tanna hmunah hian District Child Protection Officer (DCPO) Pi Mary Lalremruati'n hawnna thu sawiin, tlan turte a vai liam a. Areopagy-a a kharna hun hmanah Lawngtlai Sub-Deputy Commissioner Pu Vabeimozachhi Chozah chuan HIMNA-MADAT Project hnuaia hma lakna hnuaiah zuk leh hmuam leh ruihhlo chi hrang hrang laka inthiar fihlim a tulzia a sawi a. Protection Officer (Non-Institutional Care) Pi H. Zohlimpuii Hmar chuan lawmman semna hun kaihruaiin, Protection Officer (Institutional Care) Pi PC Malsawmtluangi'n lawm thu sawina hun a hmang bawk.

He mini marathon-ah hian Lawngtlai khawpui chhunga naupang eng emaw zat an tlan a. Kum 10-14 hmeichhiaah Christina Lalzawmpuii chu pakhatna niin, pahnihna Jessica Chanchinmawii leh pathumna Genevi Lalnunmawii te an ni a. Kum 10-14 mipaah Andria Vanlalhmana pakhatna niin, pahnihna Reuben Ramdanfela leh pathumna Lalthanmawia te an ni a. Kum 15-17 hmeichhiaah pakhatna Nancy Lawmsangzuali leh pahnihna Lalrinfeli te an ni a. Kum 15-17 mipaah pakhatna Reubena, pahnihna N. Lalduhmawia leh pathumna Eliza Lalhmingliana te an ni. Lawmmanah pakhatnain Rs 1,000/-, pahnihnain Rs 700/- leh pathumnain Rs 500/- an dawng theuh a ni.