District Child Protection  Unit leh District  Legal Services Authority-te  tangkawp buatsaih Children’s Week, Naupangte pual hapta November Ni 14, 2019 atanga hman chu vawiin khan  Kahrawt Community Hall-ah kharna neih a ni a.  He hunah hian Pi Lalrochami Ralte, Chief Judicial Magistrate (CJM) chu khuallian a ni.

Khuallian Pi Lalrochami Ralte, CJM chuan hlawhtling taka Children's Week huaihawt ani thei chu lawmawm a tih thu sawiin, naupangte hmakhua ngaia thawktu zawng zawngte inpekna leh thawhrimna chu fakawm a ti a.  Naupangte chu India ram danin a humhalh tlat thu sawiin, hnathawka chhawrte, kutdawhtir leh an chunga hleilenna ang chi reng reng thlentir chu dan kalh tlat a ni a, hetiang tiluite chu na taka hrem theih an ni, a ti a. Naupangte chu Isuan a hmangaih em em te an nih avangin anmahni enkawla venhim chu puitlingte mawhphurhna anih thu a sawi  a. Naupang thil tisual an awm pawhin Jail-ah dah mai lovin an insiamthatna turin Home-ah  dah an nih thin thu sawiin,  naupan laia harsatna leh tawhsual lo tawk tawh mi ropui leh hlawhtling tak takte a tarlang a.  Naupangte chu an chungah eng harsatna pawh lo thleng se beidawng lova Pathian hnena tawngtai thin tura fuihin tawngtaina chu beidawnna laka venghimtu a nih thu a sawi a. Nakin lawka mi hlawhtling leh ropui ni ngei thei tura taima taka lehkha zir thin turin a fuih nghal bawk a ni.

Children's Week kharna hun naupang venhim leh enkawl damna pek ngaite puala buatsaih hi Pu Lalnunmawia, Juvenile Justice Board (JJB) member chuan a kaihruai a.   Khuallianin Child Welfare Committee (CWC) leh Juvenile Justice Board (JJB) member-te hnenah naupangte tana an thahnemngaih leh hnathawh that avangin chawimawina thuziak a hlan a. Kharna hunah hian naupangte chawkhlima tihphur thei tur zaite ngaihtlak anih bakah, infiamna neih niin,  ennawm hrang hrangte entir a ni.  Children’s Week pual hian November Ni 14 khan Champhaiah kawng zawh niin, November Ni 19 khan Rohmingthanga Recreation Centre, Kahrawtah Children’s Carnival buatsaih a lo ni tawh bawk a ni.