Mizoram sawrkar chuan a vawikhatna turin chawhnu dar 2, November 26 hian Vanapa Hall-ah Constitution Day hman a rel a. Vawiin chawhnu khan Aizawl DC's Conference Hall-ah he hun hman dan tur sawihona hi Pu John LT Sanga, Addl DC hovin neih a ni.

India ram Danpui hi Constituent Assembly chuan kum 1949, November 26 khan a pawm(Adopt) a.  Kum 1950 January 26 khan  a taka hman tan  a ni a. He ni pual hian Constitution Day hi India ram hmun dangah chuan kumtin hman thin a ni. Mizoramah pawh kumin atangin kan hmang tan dawn a. He ni puala Vanapa Hall a vantlang inkhawm hi Chief Secretary Pu Lalnunmawia Chuaungo chuan a kaihruai dawn a. Governor PS Sreedharan Pillai chu khuallian a ni dawn a ni.