Vawiin chawhma dar 11:00 khan District Level Steering Committee on Student Police Cadet (SPC) chu an chairman, Serchhip District Bawrhsap ni bawk Pi Sangchhin Chinzah hovin a Pisa ah an thu khawm.

Chairman chuan, sawrkarin zirlai naupangte hma khua atana thil pawimawh leh hlu tak mai Student Police Cadet (SPC) din a, Serchhip District ah pawh kalpui a ni chu lawmawm a tih thu te, tangkai leh hlawk taka he Cadet hi kalpui theih ngei a that thu a sawi a. Khua leh tui tha ni zel tura naupangte zirtirna hmun tha tak a tling a ni, a ti.

SPC District Nodal Officer Pu PC Laltanpuia, Addl. SP Serchhip chuan report pein Marian High School Serchhip a zirlaite nen SPC hi an kalpui mek thu sawiin, zirlai naupangte chu activity hrang hrang, dan leh thupek  kenkawhna kawnga Police hnathawh dante, damdawi hmansual leh hur sualna laka invenna leh dan kan neih te, chhiat rupna thlen palha hmalak dan turte, First Aid  pek dan te, Drill te an zirtir bakah, Serchhip Police Station tlawhpui an lo ni tawh thu a sawi a. Student Police Cadet hmalakna in a thiltum hrang hrangte chu a kokim thei ang bera zirtir leh hrilhhriat an tum thu a tarlang a. N.Vanlaiphai High School chu SPC kalpui nana tun hnaia thlan belh leh a nih thu a tarlang bawk. Vawiina meeting hian SPC Programme hnuaiah mithiam te nen Indoor leh Outdoor programme hrang hrang a tam thei ang ber neih chhoh zel a rel a, kum 2020 Republic Day lawmnaah Student Police Cadet hmingin Parade Contingent tel ve ni se an ti bawk.

SPC hi Kum 2010 khan Kerala sawrkar chuan sawrkar school 130 ah a kalpui tan a, 2011 khan All India Police Science Congress chuan state tinte chu he hmalakna hi zawm ve turin a sawm a. Chumi kal zelah chuan kum 2018, July Ni 21 khan Union Home Minister Pu Rajnath Singha’n “We learn to serve” tih  thupuia hmangin India ram puma hman turin a lo hawng zui ta a ni. Mizoramah  pawh State Level Steering Committee on SPC hi din ve nghal niin Chief Secretary, Mizoram chu Chairman a ni a, State Nodal Officer atan Mizoram DIG (Training) chu ruat niin, DGP Mizoram te, Home Department Secretary leh Education Department Secretary te chu Committee member an ni. An hnuaiah  hian District Level Steering Committee on SPC din leh niin District  Magistrate chu Chairman a ni a, Superintendent of Police, Addl. SP leh SDEO te chu Committee member an ni. Student Police Cadet ah hian School pakhat zelah zirlai 44 an awm a ni.