Armed Veng leh Falkland inkar lei leh Bethlehem Vengthlang to Aizawl Bypass road a Chite lei te chu vawiin chawhnu khan Parliamentary Secretary to Chief Minister Pu Lal Thanzara chuan ribbon chep chatin a hawng.
Heng lei hawnna pual inkhawm Bethlehem Vengthlanga neihah thu sawiin Pu Lal Thanzara chuan Bethlehem Vengthlang - Aizawl bypass road hi 2006 atang tawha mi thahnemngaite inphalna avanga bul tan a nih dan te, PWD in thapui thawha Aizawl khawpui veng hrang hranga kawngpui chei that hna an thawh leh Bukpui tlangdung, Serkhan - Bagha kawngpui sial mek te chu thil chhinchhiah tlak leh chhuanawm tham an tling a ni, a ti. Aizawl-Sialsuk-Thenzawl-Lunglei kawngpui pawh World Bank sum hmanga zawhfel a nih hnuah sorkar hmalaknain tunah hian Rawpuichhip khua atanga khawthlang lam khaw hrang hrang inkalpawhna tur World Bank sum hmang veka hmalak tur pawh sorkar laipui leh World Bank thu neituten pawm fel tawhin hma lak tan dan tur zirchiang turin World Bank hotute’n Mizoram an rawn tlawh thuai dawn, a ti. Tunlaia Zoram hmun hrang hranga PWD in kawng tha zawk leh kawng thar kan neih theih nana hma a lak mek leh black topping hna thawh mek te, Aizawl khawpui chhung kawng siam mam hna thawh mek te, MZU kawng siam mek leh Sihhmui - MZU kawng siam dan tur hmachhawp te thlir hian Mizoram chanchinah hetiang taka kawng siam lam leh in sak hnate PWD in hma a lak nasat hi sawi tur a la awm ngai lo, Parliamentary Secretary Pu Lal Thanzara chuan a ti bawk.
Chite Lei hawnna inkhawm hi PWD Principal Secretary Pu Lalram Thanga’n a kaihruai a. Pu C Lalhmingthanga, SE, PWD-in lei dawh dan leh sum sen dan tlangpui a sawi a. Engineer-in-Chief Pu Lianchungnunga’n lawmthu sawiin hun hnung a khar a ni.
Cheng nuai 229.21 senga dawh Armed Veng - Falkland Road-a Chite Lei hi metre 20 a thui a ni a. A lei zau zawng hi metre 8.58 (double lane) niin January 10, 2013 khan dawh zawh a ni. Bethlehem Vengthlang to Aizawl Bypass road a Chite lei hi metre 35 a thui, metre 6 a zau a ni a, cheng nuai 275.60 senga siam niin March 4, 2013 khan peihfel a ni. He lei hi PSC Bridge a ni a, a danglam bikna chu motor rit takin a zawh vanga danglamna lo awm kha motor-in a zawh loh veleh a ngaiin a awm leh mai thin a ni.
Chite Lei hawnna inkhawmah hian Col. ZS Zuala, Parliamentary Secretary, Law Commission Chairman Pu R. Lalrinawma, MLA Pu K. Liantlinga te leh Sorkar mipawimawh engemawzat an tel a ni.
