Vawiin khan National Institute of Electronics and Information Technology (NIELIT) Aizawl leh Rotary Club of Aizawl tangkawp te buatsaih, thla thum chhung awh tur ‘Certificate Course on Mobile Phone Repair & Maintenance’ chu Pu P. L. Thanga, IAS (Rtd), Member Secretary, State Planning Board chuan NIELIT hmunpui Zuangtui-ah a hawng.
Pu P. L. Thanga chuan NIELIT leh Rotary Club ten thalai te tana eizawnna tling mobile repair course an ngaihtuah chhuak chu lawmawm tiin Information Technology leh technical lam zirna peng hrang hranga tan lak a pawimawh hle a ni, a ti a. Tunlai khawvel thang chho meka technology pawimawh zia leh a tangkai dante zau taka sawi langin technology lamah kan than chhoh loh chuan hma kan sawn chak thei lovang a ti bawk.
Pu P. L. Thanga chuan Chief Minister Pu Lal Thanhawla’n thiamna leh eizawnna kawnga Skill Development a ngaihpawimawh thu sawiin leh hemi atan hian National Skills Development Council (NSDC) chuan skill development lamah Mizoram mamawh zirchiana (survey) an neih thu te a sawi a. Chumi survey-in a tarlan dan March 2010 khan Mizorama mobile subscribers 6,21,417 an awm a, kum 2008-2009 atanga kum 2009-2010 a mobile subscribers punna chu za zelah 22 vela chhut a ni a.
Survey atang ringawt pawhin mobile hmangtu te kan tam hle a, a chhiat in sum taka tak senga, phai lamah siam tir a lo ngai a, Mizo thalai ten mobile siam leh enkawl an zir chuan hemi kawnga mipui mamawh phuruk anih theih bakah thalai te tan eizawnna kawng a in hawng thei in Mizoram economy a pui thei dawn bawk a ni, a ti. Mobile chhe siam leh enkawl dan chu Industries Department hnuaia NLUP Trade pakhat atana telh ve anih tur thu a sawi a. Training tur te hlawhtlin ngei tumna rilru pu a taima taka training turin a fuih bawk a ni.
He programme kaihruaitu NIELIT Director Pu Prameshwor Singh chuan training bultan naah hian khawpui chhunga thalai 20 lak phawt an nih thu leh thingtlang leh district dang mi te pawh a thawhhnih naah lak belh zel an tum thu a sawi a ni. Director chuan training kawnga hian Nokia leh Samsung company te dawr an tum thu a sawi tel bawk a ni.
NEILIT hi tunhma chuan DOEACC tia hriat a lo ni thin a, kum 2001 khan din a ni a. Computer, electronics leh IT course zirna hrang hrang course 16, MCA thlengin an kalpui mek a, zirlai naupang 650 bawr vel an nei mek a, ST leh SC zirlai te tan zirna hi a thlawn liau liau a ni. Tunah an hmalak pawimawh tak te chu - Aizawl khawpuia sawrkar leh private hospital-a thawk paramedical staff te tan damdawiina khawl hrang hranga an hman thin enkawl dan training te; Cyber security chungchanga sikul leh college zirlai naupang te bakah sawrkar hnathawk te tan training buatsaih te leh e-governance chungchanga capacity building neih te an ni.
An hmalak tawh thenkhat te chu - Medical Equipments Laboratory changtlung tak din; hmeichhia leh thalai te tan IECT chungchanga training neih te; Computer Forensics Lab leh training facilities buatsaih te leh minority zirlai te tana free coaching buaitsaih te a ni.
Thla hmasa khan NIELIT Extension Centre Lunglei chu hawn a ni a, Govt. Aizawl College-ah Study Centre din ni tawhin Study Centre dang Hrangbana College-a din tum mek a ni bawk. NEILIT hian Mizoram hi Totally Computer Literate State anih theih nan kawng hrang hrangin hma lak an tum mek a ni.
