Vawiin khan Mizoram sorkara Disaster Management & Rehabilitation Department leh GeoHazards Society (partners with GeoHzards International) tangkawpin lirnghing leh leiminin Aizawl khawpui a nghawng dan tur leh hemi laka inven dan tur leh chhiatrupna thlen palh pawha a hnua insawngbawl dan tur chungchang ni 3 awh tur ‘Technical Panel Meeting on Earthquake & Landslide Risk Reduction of Aizawl City’ an buatsaih chu Secretariat Conference Hall-ah neih tan a ni a. He Meeting hawnnaah hian Mizoram Finance Minister Pu H.Liansailova chu Khuallian niin DM&R Minister of State Pu Nihar Kanti Chakma chu Khualzahawm a ni.

Panel Meeting DM&R Principal Secretary Pu P.C.Lallawmsanga kaihhruaiah Khuallian Pu H.Liansailova chuan Mizoram chu lirnghing na tak thlen theihna hmun Seismic Zone V-ah awm a nih avangin mithiam zawkten kan leilung chungchang leh hetiang chhiatrupna thlen palh pawha kan dinhmun tur chiang taka min hrilha min zirtir hi a pawimawh hle a ni, a ti. Mizoramin helama finchhuah leh tanpui kan mamawhzia hriain GeoHazards International ten a thlawna a hmuna lo kal a, zirna leh training an rawn buatsaih bakah chhiatrupna lo thlen palh pawha kan hmachhawn dan tur Project min duansak a tum avangin lawmthu a hrilh bawk a ni. Mizoram chu ram naupang te a nih thu sawiin Pu Liansailova chuan hmasawnna kawng hrang hranga ke kan pen tan ve mek laia chhiatrupna kan tawh palh chuan, a pawi thuizia tur ngaihtuah phak pawh a ni lova, chuvangin ramchhung leh ram pawn atanga mithiam rual lo kal khawmin a thlawna min rawn buaipui hi a lawmawm tak zet a ni, a ti.

Khualzahawm DM&R Minister Pu Nihar Kanti Chakma chuan sorkarin chhiatrupna thleng tur laka inven dan kawngah theih ang anga hma a lak mek thu a sawi a. Aizawl khawpui than dan leh in sak dan en chuan vawiin ni thlenga him taka kan kal mek hi Pathian zahngaihna vang liau liau a ni a, hun lo kal lehzel turah chhiatrupna thlen lo palh pawha Mizo mipuite an in ralring theih dan tur hrilh tura mithiam lo kalte chungah lawmthu a sawi bawk a ni.

GeoHazards International Sr. Adviser Pu L. Thomas Tobin chuan an pawl chanchin sawiin khawvel hmun hrang hranga lirnghing emaw leimin emaw chhiatrupna dang a thlen pawhin an pawl chuan theihtawpa hma an lak thin thu a sawi a. Mizorama an rawn kal chhan chu a ram leilung leh a bik taka Aizawl khawpui zirchiang tura lo kal an nih thu a sawi a, khawvel hmun danga an thil hmuh leh tawn tawh atangin thurawn an pek theih ngei an rin thu a sawi bawk. GeoHazards chuan leilung awmdan atangin Mizoram hi lirnghing eng ang a nain nge a sawi thei ang tih te, chutiang thleng palhah pawh engtia in ven lawk theih nge a nih tih te leh lirnghing awm theih dan tur a lema awm tir chhina, Aizawl chu eng ang takin nge a khawih chhiat theih ang tih an zir tur thu a sawi bawk a ni.

Geology & Mining Jt. Director Dr.Lallenmawia chuan Mizoramin harsatna a tawh pathum te chu kan ram leilung insiam danah thil fel lo awm sa (ill geological set-up), ruahsur nasa tak leh tlangram khawkrawk taka cheng kan nih avang a ni, a ti a. Mizoram leilung chu a la nemin ruahtui luanchhuahna tur luikawr felfai tak kan la nei thei lo te chuan leimin a tih tam zual thu a sawi bawk. Mizoram pum an zirchiannaah High Risk, Moderate Risk leh Low Risk Area-ah then a nih thu sawiin mihring indaihlohna te, mipuiten chhiatrup thlen theihna kawnga hrilhhriat an la mamawh viau thu te leh duh anga hmanrua a awm loh avanga hmalak a chak theih loh thu a sawilang bawk a ni.

Vawiina tan tak Panel Meeting-ah hian DM&R hotute bakah a kaihhnawih department hrang hrang aiawhte an tel a. Expert Team lo kal te chu : L. Thomas Tobin (Ex-Director, California Seismic Safety Commission Policy Advisor), Leonardo Seeber (Columbia University- Seismology, USA), D. Srinagesh (National Geophysical Reserach Institute, Hyderabad- Seismology), Kevin Clahan (San Francisco-Engineering Geologist, USA), Bill Holmes (FEMA Consultant, California-Earthquake Engineer, USA), Prof.Pradeep Ramancharla (IIIT, Hyderabad- Earthquake Engineer), Dr. Janise Rodgers (GeoHazards International-Earthquake Engineer, USA), Larry Mintier (Sacramento- Landuse Planner, USA), Prof.Ajay Katur (Centre for Environmental Planning & Technology, Ahmedabad- Land Use Planner), Hari Kumar (President, GeoHazards Society-Disaster Manager, Delhi) leh Mrinal Nath (GeoHazards Society-Mitigation Specialist) te an ni.