Vawiin khan Save Chite Lui Movement kalzelah Chite Lui Baseline Survey neih tan a ni a. He Baseline Survey-ah hian Chite Lui chu a hnar atanga luiin Tuirial Lui a zuk finna thlengin chipchiar takin zirchian a ni dawn a, Chite Lui bakah a chawmtu lui hrang hrang (tributaries) te leh a luikam tawna thil awmte pawh chipchiar taka zir a ni dawn a, he survey hi Junior Research Fellow pahnih leh Research Assistant pathumin thla khat chhung an thawk dawn a ni.

Chite Lui Baseline Survey hi inkhawm tawi nen Chite Veng Mini-Sports Complex bula Chite Lui kamah Aizawl DC Kannan Gopinathan-a hovin bul tan a ni a. He inkhawm hi Rin Sanga, IAS (Retd.), Vice Chairman, Zoram Research Foundation-in a kaihruai a. Aizawl Bawrhsap chuan thusawiin Aizawl khawpui tana Chite Lui pawimawhna hi Mizo mipuiin an hrethiam tawk tawh lo nia a hriat thu sawiin he lui mawi tak hlutna hi a thara kan hriat tul a tih thu a sawi a, chhanchhuak tur leh humhalh turin mitinin tha kan thawh ngei a beisei thu a sawi a, thu a sawi zawh hian Baseline Surveyor-te chu luidungah a vai liam nghal a ni.

Chite Lui chhanchhuak tura hmalakna hi kum sawm chuang kalta atang tawh khan Zoram Research Foundation-in bul a lo tan tawh a. Tunhnaiah Mizoram Governor Lt Gen Nirbhay Sharma, PVSM, UYSM, AVSM, VSM, (Retd) leh Aizawl Bawrhsap Kannan Gopinathan te hmalaknain awmze nei zawka tharthawh leh a ni ta a. He movement hi Mizo mipui zawng zawngin tha an thawhna tur chi a nih avangin huamzau takin Save Chite Lui Movement atan hian Save Chite Lui Coordination Committee din a ni tawh a, he Committee-ah hian Larsap chu Patron a ni a, Mizoram Chief Secretary Pu Malsawma chu Chairman a ni.