Vawiin hian Fisheries Department Serchhip District chuan Lersia Hall, North Vanlaiphaiah Sangha khawitu thlan bikte tan sangha khawi dan inzirtirna hun a buatsaih.

He training hi tun hnaia Department-in tanpuina a pekte tana buatsaih a ni a. He hun kaihruaitu Pi Zonuntluangi, District Fisheries Development Officer chuan, Hrangturzo Circle chhunga mipuite chu Mizo mipuite hriata Lui dung Sangha humhalh kawnga hma la hmasa leh midang tihhmuhtu an ni chu lawmawm a tih thu a sawi a. Kan tu leh fate tan ram nuam leh chhenfakawm kan hnutchhiah theih nan kan ram luidunga nungchate venghima, duat taka enkawlin tan la thar leh zual turin kalkhawmte a chah. Mizoramin Sangha tam zawk kan thar chhuah theih nana theih tawp chhuah turin leh tanpuina ringawt beiseitu nilo turin a ngen a ni. Chutih rualin tanpuina an dawng thei erawh chu a lawmpui thu sawiin, Sangha chu eitur hrisel anih avangin Sangha ei uar turin a chah bawk a ni.

Training ah hian Fisheries  Technical mithiam ten zirtirna pein,  Buh kar (Leilet) a Sangha khawi dan leh Sangha dil laih – a hmun hma thlan dan leh mahni Sangha no thar chhuah hmanga Sangha khawitu te an intodelh theih nan Sangha no neihtir dan uluk takin a lem nena entirin zirtirna an pe a ni.

Hrangturzo Circle chhungah hian FFDA (Fish Farmer Development Agency) hnuaiah tanpuina dawngtu mi 46 an awm a, tanpuina dawng tharten sangha dil an laih te an endik nghal bawk a ni.