Vawiin chawhma khan Aizawl District Deputy Commissioner leh Chairman, Aizawl District Disaster Management Authority ni bawk, Pu Kannan Gopinathan chuan tui tlak hlauhawmna hmuna tar tur vaukhanna thuziak (warning signboard) chu Central YMA kutah a hlan.

Bawrhsap Pu Kannan Gopinathan chuan  heng warning signboard tarna tur hmunte hi chetsualna thlen fo na thin te an nih avangin leh, mipuiten ngai pawimawha, nunna hlu tak chhanhim a nih theihnan zawm ngei nise a tih thu a sawi a.

Aizawl District Disaster Management Authority leh Central YMA tangkawp in chetsualna thlen tam zualna hmuna warning signboard tar ni se, tia an lo rel tawh bawhzuina hi a thawh khatna atan hmun panga (5), Tuirial—Khumtung Kai, Reiek Kang, Sihhmui Kai, Sairang—Tlawng kai leh Tuirial Lei bulah te tar a ni dawn a. Signboard bakah hian a tarna leh phurhna senso tur Rs. 10,000 chu CYMA aiawhin Pu Lalhruaitluanga, Chairman leh Pu Zochhuana, Secretary, Disaster Management Sub-Committee, Central YMA ten an dawng a ni.