MZP Sub-headquarters, Bilkhawthlir buatsaihin vawiin khan kumina Bilkhawthlir a High School leh Higher Secondary School atanga HSLC leh HSSLC pass tharte lawmpuina hun Community Hall-ah neih a ni a, Bialtu MLA Pu K.Lalrinthanga, Parliamentary Secretary in a hmanpui.

Bialtu MLA chuan zirlai hlawhtlingte lawmpuina hun siam a nih chu lawmawm a tih thu leh pass thar zawng zawng te a lawmpui thu sawiin, an ke pen zelna turah duhsakna a hlan a. Nu leh pate'n fate zirna ngaipawimawh a, chhungkaw khawsak har chung chung pawha lehkha an zirtir thin chu chhuanawm a tih thusawiin,  Zirlai te chu nu leh pate lawmthu hrilh fo turin a chah a ni. 

Vawiina pass tharte lawmpui hi HSLC ah 26 leh HSSLC ah 24 an ni a, First division leh second division a pass te hnenah lawmpuina thuziak leh dictionary hlan niin, third division a pass te hnenah lawmpuina thuziak hlan an ni. Bilkhawthlirah hian High School pahnih leh Higher Secondary School pakhat a awm a. Higher Secondary School hi khawtlangin thahnemngaia an din a ni a, Bialtu MLA hian Secondary School building sak chhunzawm nan Rs.5lacs, MLA fund atangin a pe a ni.

Pu K.Lalrinthanga hian District LAD Park, Thingdawl a mi chu tlawhin, a thuam thatna tura hmalakna leh ruahmanna awm te a en a ni.

 

Attachment

  • Loading attachment...