Vawiin chawhnu khan Administrative Traning Institute  Conference Hall-ah State Level  Monitoring Committee(SLMC) on PMEGP chu an thukhawm a.Meeting-ah hian sawrkar mi pawimawh te leh Bank hrang hrang aiawh te an tel a. Kum 2016-17 chhunga PMGEP tanpuina sum pekchhuah tak te leh a hlawhtlinna te thlirho niin kum 2017-18 chhunga PMGEP tanpuina kalpui dantur pawh sawiho a ni.

SLMC on PMEGP hi Chairman Pu Zothan Khuma, Commissioner/Secretary, Commerce & Industries, etc., in a kaihruai a. PMEGP tanpuina diltu lam atanga harsatnate sawichhuah niin Bank hnathawkte chu PMEGP tanpuina diltute tana remchanna lo siamsak tur leh nasa zawka lo pui tura ngen an ni a. Bank aiawh lam te pawhin harsatna an tawh dan te leh ruahmanna tha zawk anga an hriat te an tarlang a ni.

Bank-wise Achievement on PMEGP 2016-17 in a tarlan dan chuan kum 2016-17 chhung khan Mizoram chhunga Bank hrang hrang 25 leh an Branch theuh te chu hnathawhtur 4592 siamchhuak thei turin PMEGP tanpuina sum  cheng nuai 1148.39 pechhuak tura tuk an ni a. Mahse  kum 2016-17 chhung khan PMEGP tanpuina sum chu PMEGP unit 711 hnenah Cheng nuai 766.56 pekchhuah niin hnathawhtur 5688 a siamchhuak niin tarlan a ni a. Bank ten PMEGP an tihhlawhtlinna hi 66.75% a ni.

Bank zingah Indian Overseas Bank (158%), Punjab National Bank (133.33%) leh United Bank of India(100.61%) te chu PMGEP tanpuina sum pekchhuahtur tuk an nih zat aia tam pechhuak thei te an ni a. Hetih lai hian ICICI, HDFC,  Federal Bank, Indusind Bank, YES Bank, South Indian Bank leh Bandhan Bank te erawh chuan PMEGP tanpuina hi pekchhuah an nei lo a. Bank lian zingah SBI (Rs 174.89 lakhs), Mizoram Cooperative Apex Bank (Rs 162 Lakh),  leh Mizoram Rural Bank (Rs 105 lakh) te chu PMEGP tanpuina sumhlawm  thehchhuak tam fal deuh te an ni.

Bank-wise & Agengy- Wise PMEGP Target for 2017-18 in a tarlan dan chuan PMEGP tanpuina sum hi Agency pathum- KVIC (Rural Area), KVIB (Rural Area) leh DIC (Urban & Rural Area) te chuan Bank 25 leh an brach atang te in Cheng nuai 1245.66, hnathawhtur 4984 siamchhuak thei turin pek chhuah leh an ruahman a. Aizawl District tan cheng nuai 378, Kolasib District tan cheng nuai 154, Serchhip District tan cheng nuai 161.70, Champhai District tan cheng nuai 130, Mamit District tan cheng nuai 112, Lunglei District tan cheng nuai 153.70, Saiha District tan cheng nuai 50 leh Lawngtlai District tan cheng nuai 106.26 te ruahman chhin a ni.