Vawiin khan Aizawl Bawrhsap Pisapui leh sawrkar department/Agency hrang hrang UD&PA, PHED-SBM (Gramin), Aizawl Municipal Corporation, State Bank of India, Zoram Research Foundation, college zirlai leh Chite lui bula veng hrang hrang tangrualte hmalaknain Chite lui leh a bul hnaia bawlhhlawh tam tak awm mekte tihfai leh humhalh beihpui ‘Save Chite Lui” movement kalpui tan a ni. Save Chite Movement hi vawiin khan Chite Mini Sport Complex-ah Aizawl DC Pu Kannan Gopinathan, Aizawl Bawrhsap Pisapui-a Disaster branch-te leh Govt. T.Romana College te chuan an College Silver Jubilee pualin an hmang.
Save Chite Lui humhalh leh thenfai bultanna hmanpuitu Aizawl D.C Pu Kannan Gopinathan chuan, Chite lui hi Aizawl khawpui tan a hlu em em a, chuvangin humhim a pawimawh hle, tih sawiin, Tuihna humhalh a tul piah lamah lui kama bawlhhlawh tam tak te hi then fai a tul a, chuvangin he programme hi siam a ni a, Aizawl mipuite hian he lui pawimawhna hi hria a, uluk leh thahnemngai taka enkawl a, he lui hian mipuite thinlunga pawimawhna leh hmun lian tak a neih leh theihna turin tanrual a tul tih a sawi. Hetianga tawp hnawk awm khawmna a nih lohna turin vawiin atang hian tan lak a tul tih sawiin, Govt. T.Romana College ten an College Silver Jubilee lawman denchhena Chite lui humhalh leh thenfai hnatlang an nei chu lawmawm leh entawn tlak, a ti bawk.
Chite Lui humhalh beihpuithlakna ah hian Govt. T.Romana Colege zirlai 500 chuang zet an kal khawm a, hmun ngaa inthenin DC hovin Chite Lui thenfai hnatlang an nei nghal a, hnatlangte ei leh in senso atan Aizawl Municipal Corporation, Mayor Pu P.C Lalhmingthanga’n cheng 5000 a pe a, Chite Veng YMA in hnatlangte ei tur an siam sak bawk a ni.
Govt. T.Romana College hian an Silver Jubilee pualin Chite lui humhalh leh thenfai hnatlang an neih bakah March ni 27 leh ni 29-ah Indian National Fellowship Centre (INCF), Mumbai nena tang kawpin Republic Vengthlang leh Tachhip-ah Free Medical Camp neiin June ni 30-ah Blood Donation Camp neih an tum bawk a ni.
He hun hi Pu Lalhmunsanga Hnamte, Addl. DC chuan a kaihruai a, Dr. Lalrintluanga, Principal, Govt. T.Romana College, Zoram Research Foundation (ZoRF) aiawh leh Pu F. Vanlalsawma, Chite Veng Local Council Chairman ten Chite lui chanchin leh humhalh a tul zia infuihna hun an hmang bawk a ni.
