1. Chite Rehabilitation Site-a Sorkar ram lak (acquired) area chu Aizawl D.C. Office chuan teh nawn tul ti tawh lo mahse Press mite ngenna angin an bialtu MLA Pu Lalthanliana hovin Ramhlun Sports Complex Local Council-te, an veng tlawmngai pawlte, Press mite leh Aizawl D.C. Office-a Officer thenkhatte awm laiin dt.23.9.2015 (Nilaini) hian teh that leh a ni a. Sorkar-in ram a acquire dawna tehtu, tuna District danga post tawhte - Pu F. Lalnghaksanga, Surveyor leh Pu H.Rochungnunga, Surveyor te ngeiin ram hi an teh leh a ni.
2. Helai hmuna Sorkar ram lak chin teh that lehnaah hian sorkar ram lei chin (acquired area) pumpui teh that ni lovin RSC Local Council member-te’n ram an lo inpek area chu sorkar ram lei chhung a nih leh nih loh teh that a ni a. Helai ram tehtu Surveyor-te chuan an teh hmasak ber tuma an measurement records ang chiah a la nih thu leh hemi chhungah hian Ramhlun Sports Complex Local Council-ten ram an lo inpek ve ringawt hi a tel ngei a ni tih an finfiah a ni. Tin, Pu Zalara'n In a sak bakah hian an Local Council Chairman hlui tuna an Vice Chairman ni mek Pu Parliana’n acquired area chhunga anmahni ram lo inpek ve ringawtah hian RCC Building a lo rel ve tawh a ni tih hmuhchhuah a ni bawk.
3. Hei bakah hian D.C.Office chuan Ramhlun Sports Complex Local Council te insawifiahna chu chiang takin a chhanglet tawh a. Ramhlun Sport Complex Local Council-ten ram an inpek ruk hi sorkar hnena ram hralhtu ngeiin ziakin a pek loh thu a sawi a, Sorkar-in Local Council-te hi a pe bawk si lo a; engtin nge helai ram hi an lo neih ve ringawt tih hi zawhna lian tak a ni.
4. Aizawl Post Chanchinbu dt.10.9.2015-a chhuakin a tarlan danin, Ramhlun Sports Complex Local Council-ten dt.9.9.2015-a Press Conference an neih tumin Sawrkar ram lak hrula mi tho LSC pahnih dang chu a neitu nena inhriatthiam tawnnain Local Council-te hian an hman hawhsak zui ta tih an Local Council, Vice Chairman Pu Parliana’n a sawi a. Nimahsela, a ram neitu ngei hian D.C. Office atanga ram awl a awm tawh lo tih a va finfiah avangin, ram pek tur emaw hmantir tur engmah a awm lo a ni tih a sawi tawh si a. Ramhlun Sports Complex, Local Council te hian thu belhchian dawl lo an sawi kual vel mai mai niin a lang.
5. Chite Rehabilitation Site panna kawng laih hna hi DM & R Department sum Rs. 15,00,000.00 hmangin AIE Construction-in an lai a, a kawng tawp lamah AIE Construction tho hian leimin dawlna (Check Dam) an siam a. He Check Dam lian tak siamna tur bungrua rit tak tak lak luh na atana lirthei tlan luh ngei ngei a ngaih avangin kawng siamtute hian helai kawng hi tha taka an siam ngei a rinawm. Tin, Check Dam hi pawisa awm veleha la siam chhunzawm leh tur a ni bawk. Chuvangin, khatih laia Ramhlun Sports Complex Local Council Chairman Pu Parliana’n DM & R Office atanga a tulna apianga hman tur Rs. 2,60,000.00 a lak te, vantlang thlanmual tura Sorkar-in a pek Rs. 3,50,000.00 a an hralhna man leh thingkung tam tak Sorkar ram chhunga mi anmahni thua an lo lilam (auction) ve ringawt atanga pawisa chhuak hi, mipui tan an hmang ngei em tih hi zawhna lian tak a ni.
6. Vanglaini September 22, 2015 chhuakah Ramhlun Sports Complex Branch YMA thuchhuah tarlan niin “YMA President-in Committee ko lovin ama thuin complaint a thehlut” tia an Local Council Chairman hluiin Press Conference-a a sawi chu thudik lo a nih thu an sawi a. An veng Local Council-te chet dan dik lo tak chungchang Sorkar-a complaint an thehluh chu YMA OB meeting in ngun taka a ngaihtuah hnua a thutlukna a nih thu leh Branch Executive Committee pawhin a tir atanga tun thlenga a hriatpui thu tarlan a ni.
7. District Administration chauh pawh ni lo, anmahni veng Branch YMA leh zel pawh an dodal duh avang hian Ramhlun Sports Complex Local Council-te chet dan hi inthup mawi tumna mai a nih zia a lang chiang hle a ni.
8. Ramhlun Sports Complex Rehabilitation ram hi DC, Aizawl chuan Press Conference a neih tuk dt.4.9.2015 (Zirtawpni) khan teh that leh nghal tumin hma a la a. Helai ram lak (acquired) a nih dawn laia tehtu Surveyor, Pu F.Lalnghaksanga, Lawngtlai-a a nupui hnathawk tlawha kal mek pawh emergency-a koh a nih angin a zan a zanin a rawn tlan phei nghal a. Vanduaithlak takin an rawn haw kawngah chesualin Damdawi Inah dah hial a ni a. Hetianga mi pamhamte thiltih avanga Official-ten tuar loh tur an tuar leh zel hi a pawi takzet a ni.
9. Pu Ringzova kaihhruai Ramhlun Sports Complex Local Council hi Aizawl District Administration chuan a ring zo tawh lo a. Chuvangin MP/MLA Funds leh Developmental Works hrang hrangah Implementing Agency atan hmantlakah a ngai tawh lo a ni.
10. Hetianga khuarel chhiatna tuartu mi vanduaite chanai eisak duh leh Sorkar-in anmahni khawtlang tan ngeia thlanmual tur ram a pek leh zel pawh hralh ru duh khawtlang hruaitu an awm hi Aizawl District Administration chuan pawi a ti hle a, en liam mai mai a tum lo a ni.
11. Ramhlun Sports Complex Local Council-te thiltih dan tenawm tak buaipui hian Aizawl D.C. Office chu ni li lai hna dang thawk mumal thei lovin an awm a. Anmahni dawrtu mipuite hnenah hriatthiamna an dil a. Chite Rehabilitation Site hi Public interest atan liau liaua siam a nih avangin Aizawl D.C. Office chuan mipui rawng a bawlna tikhaihlak zawnga hma la tawh lo turin mi tinte a ngen a ni.
12 National Disaster Response Fund (NDRF) Norms-ah hian khuarel chhiatna laka lo inven lawkna thil (preventive measures) atan sum hman theih a ni lo a. Chuti chung chuan India rama a vawi khatna atan Ramhlun Sports Complex chhunga Rehabilitation Site-ah hian Check Dam lian tha tak siam a ni a. Hemi atana sum hi Instalments-a pek a nih avangin sum a awm veleh siam belh leh zel tum a ni.
