March ni 8 atanga tan ni hnih awh Chokhlei Kut 2018 chu nimin chawhnu khan Lawngtlai East bialtu MLA Pu H. Zothangliana hovin Sentetfiang khelmualah khar a ni.

Pu H. Zothangliana chuan inbuatsaihna hun tlem te chauh a awm chunga Kut hlawhtling tak buatsaih a ni chu lawmawm a tih thu sawiin, Kut hlawhtlin nana thawktu zawng zawngte, a bik takin Sentetfiang leh a chheh vel khaw mipuite inpekna chu fakawm a tih thu a sawi a. Chokhlei Kut chu ram leh hnam hmangaihna a la tla hniam lo tih lan chhuahna a ni tih sawiin, Lawngtlai District mipuite chuan Mizorama tlang sang ber neitu kan ni hi kan vanneihzia hria a, ngaihhlut leh chawi lar nachang kan hriat deuh deuh a pawimawh a ni, a ti a. Chokhlei Kut chu hnam ziarang leh nihphung ropui tak chawi vul thar nan, khawvel hriata ram leh hnam min pho chhuaktu atan hlung leh changtlung zawka buatsaih zel turin theih tawp chhuaha tan rual a tul a ni, a ti.

Kharna hun hi Sangau Sub-Hqtrs YLA President Pu LS Lalhmingthanga’n a kaihruai a. Lawngtlai SP Pu Lalsanglura MPS chuan Kut kharna thu tawi sawiin, Sentetfiang VCP Pu Zakiaukung chuan lawm thu a sawi a. Thaltlang khaw pa, Pu Zapeng chuan hlado chhamin Chokhlei Kut 2018 chu khar a ni.

Chokhlei Kut ni hnihnaah hian zingkarah Phawngpui tlang, Far Pak thleng tlawh theihna ruahman a ni a. Mi 50 chuangin Kut Organising Committee ruahmanna hnuaiah Phawngpui tlang hi an tlawh a. Chhun lamah rock concert, costume parade leh tualchhuak infiamna hmanga inelna te buatsaih a ni a. Chokhlei Idol thlan a nih bakah, Chokhlei King & Queen thlan a ni bawk.

Kutah hian department hrang hrang leh mimal te’n an thil thar chhuah leh siam chhuah te pho chhuakin, stall an siam a. Hei hi mipuiin an hlutin, thlai chi, lei tha leh hmanraw hrang hrangte pawh an lei hlawm a. Department thenkhat chuan mipui zirtirna thuziak semin, an hna thawh dan a takin an entir bawk a. AH & Vety Dept chuan a thlawna ran entirna animal health camp buatsaihin, ran 600 chuang an en hman a ni. Hei bakah hian, ram lemthla (Nature) leh Lungzarhtum-Tlangpui sele (gaur) thlalak entirsiakna buatsaih a ni bawk a. Kut kharna inkhawmah hian lawmman hrang hrangte hi sem nghal a ni.

Chokhlei Kut hman chhunga stall tha berah Krishi Vigyan Kendra (KVK) Lawngtlai te stall chu thlan a ni a. Photo Exhibition-ah hian category 2 awmin, lawmman pakhatna latute chu category-I “Gaur”-ah Malsawmhlua Fanchun leh category-II “Nature”-ah Lc Chenhrang te an ni a. Tualchhuak infiamna – Lai paih leh insuknawr-ah Lalramchhana, Thaltlang chuan chak ber nihna a chang ve ve a. Chokhlei Idol 2018 atan Ramhleichung, Sangau-I chu thlan niin, Chokhlei King-ah John Hlondo, Pangkhua leh Chokhlei Queen-ah Lalthuthlungthari, Sangau-III te thlan an ni.