No.2715/2021-2022
Aizawl the 25th, Oct' 2021: PATH International NGO atanga Christian Hospital, Serkawn-in Oxygen Plant minute khat chhunga Liters 800 siam chhuak thei an pek dodetna tur sum chhim lam MLA 5 ten tum sak cheng nuai 20 chu vawiin khan BCM kohhran hruaitute kutah HPC Vice Chaiman Pu Lawmawma Tochhawng leh Bamboo Board Vice Chairman Dr. K. Pachhunga ten an hlan.

Hlanna inkhawm hi BCM Office Hall, Serkawn ah neih niin Rev. Dr. C. Vanlaldika, Associate Gereral Secretary, BCM in a kaihruai a, Pu Lawmawma Tochhawng chuan mipui mamawh atana tlo leh daih rei tur Christian Hospital, Serkawn in Oxygen Plant an nei thei tur a lawmpui thu sawiin Lunglei Civil Hospital ah Oxygen Plant minute khata  liter 1000 siam chhuak thei bun a ni ta chu chhim lam District pali tan a tlamuan thlak thu a sawi bawk a ni.  Pu Lawmawm Tochawng chuan Covid-19 dona lamah Sorkar, Kohhran leh tlawmngai pawl hrang hrangte thawh hona chu lawmawn a tih thu a sawi bakah RTPCR khawl chhimbialin an chhawr theih tur bun mek a ni chu rei loteah peih a nih tur thu sawiin lawmawm a tih thu a sawi bawk a ni.

Dr. K. Pachunga pawhin BCM kohhranin Oxygen khawl an bun kawnga an hmalaknain nunna tamtak a chhanhim theih a beisei thu sawiin  Lunglei DC hmalaknaa CSR kaltlanga cheng nuai 200 chuang man hriselna kawng atana hmuh a ni tawh chu mipui tan malsawmna a nih thu sawiin, chhim lam chawm thei tur khawl lian Southern Oxygen Generating and Refilling Plant, Lunglei, Pukpui hmunah bun hna thawh tan mek a nih thu a sawiin, hei hian chhim lam mipuite Oxygen-a intodelh a, hniang hnar zawka mipui tan hman theih thuai a nih a beisei thu a sawi bawk a ni.

Rev.F. Ramdinmawia, GS, BCM pawhin thusawiin BCM hmalaknaah Lunglei District MLA-te an tangkai pui thin thu sawiin, Sorkarin kohhran an ngai pawimawh thin chu lawmawm a tih thu a sawi a. Oxygen Plant hi International NGO atanga pek an nih laiin a bunna tur atan cheng nuai 53 vel a do let a ngaih thu a sawi bakah, a hmunhma siam nan bul an tan mek laia Lunglei lam MLA ten theitawp an chhuahpui chu lawmawm a tih thu a sawi a ni.

Dr. Lalramzauva,  Director, Health & Medical Department Christian Hospital, Serkawn pawhin tuna Oxygen khawl an bun thar tur chuan Covid-19 chhung atan chauh ni lova, a hnu zela damlo tam tak ten an  mamawh tur a la ni dawn tih sawiin Christian Hospital Serkawn bika khum 16 ah oxygen pek theihna tun dinhmunah an nei mek a, he khawl bun peih a nih hunah chuan damlo khum zawng zawngah oxygen pek theih a nih tur thu a sawi a ni. Hei bakah hian Mizoram sorkarin Christian Hospital, Serkawna Rapid Antigen Test May 2021-a phalna a pek atangin Covid-19 test mi 9216 neih tawhah ah mi 415 positive hmuh an nih tawh thu a sawi bawk.

Vawiina he hun hmannaah hian Rev. R. Lalbiakliana, AGS in tawngtaina neiin hun khar ani.