No.2714/2021-2022
Aizawl 25th October, 2021 : Vawiin chawhma dar 11:00 khan DC Office Conference Hall Hnahthial-ah Hnahthial District Development, Co-ordination & Monitoring Committee Meeting (DISHA) hmasa ber chu Pu C. Lalrosanga, Member of Parliament, Lok Sabha kaihhruaiin biak hmuh theihna kaltlangin neih a ni. He hunah hian South Tuipui Bialtu MLA Dr. R. Lalthangliana, Health Minister pawh a tel a ni.

Meeting kaihhruaitu Pu C. Lalrosanga, MP Lok Sabha chuan vawiinah Hnahthial District DISHA meeting pawimawh tak kan nei thei dawn a, a lawmawm hle mai a, Co-Chairman Pu K. Vanlalvena, MP Rajya Sabha a rawn tel thei dawn lova, chutih laiin South Tuipui Bialtu MLA Dr. R. Lalthangliana, Minister a rawn tel thei tur hi a lawpbnpnmawm hle a ni a ti. DISHA Meeting hi Central sorkar in a ngai pawimawh hle mai a, quarterly-a nei turin min ti a, mahse hripui Covid-19 avangin a hun takah te kan nei thei thin lova a pawi kan ti a, Hnahthial District tan bik a vawi khatna atan kan nei thei tur hi a lawmawm hle a, a tawp thlenga hun hmanpui tur te, an ngaihdan thawh turte, rawtna an neih te thawh tur te in member kalkhawmte a sawm a ni. MP chuan Ministry of Rural Development chuan he meeting hi a ngai pawimawh hle a, a khat tawkin hemi chungchangah hian lehkha pawh kan hmu reng thin a, vawiina kan meeting minutes te pawh in ngun takin an lo en leh dawn a ni tih te hria bawk ila a tha awm e a ti.

He hun hmanpuitu South Tuipui Bialtu MLA Dr. R. Lalthangliana, Minister pawhin thu sawiin Hnahthial District tana DISHA meeting neih a ni thei chu lawmawm a tih thu te, Hnahthial District hi a la naupang hle a, thil tam tak mamawh kan la nei a ni tiin, a theihna zawn zawnah MP chu tanpui turin a ngen nghal bawk a ni. Minister chuan Hnahthial District chhungah inkalpawhna kawng duh thu a la sam loh thu pawh sawiin, ram leilung hausakna a bik takin balu tha tak tak awmna Tiau leh Tuipui pawhna tur kawng mamawh a ni dan te sawiin Myanmar buaina avanga mahni sahimna zawnga Hnahthial District chhunga raltlan mikhual 2300 dawn lai kan nei a, kan unau duh tak te kan lo mikhualna kawngah hian sum sen ngaihna tam tak a awm lo thei lova, DC office te, NGO leh Kohhran hrang hrangten chhawmdawl hna an thawk a, a lawmawm hle a ni a ti.

Hnahthial District Bawrhsap Pu R. Lalremsanga pawhin thu sawiin District thar kan ni a, Hnahthial District DISHA meeting hmasa ber kan nei thei tur hi a lawmawm hle a, deparment hrang hrang pawhin theih tawp chhuahin hma kan la a, development works rawn kal-ah pawh monitoring lamah theih tawpin tan kan la bawk a, DISHA meeting tluak taka neih a nih theih nan duhsakna a hlan bawk a ni.

DISHA Meeting-ah hian central sorkar scheme kalpui chi hrang hrang Mahatma Gandhi National Rural Employment Guarantee Scheme (MGNREGS); Deen Dayal Antyodaya Yojana-NRLM; Deen Dayal Upadhyaya-Grameen Kaushalya Yojana (DDU-GKY); Pradhan Mantri Gram Sadak Yojana (PMGSY); National Social Assistance Programme (NSAP); Pradhan Mantri Awaas Yojana (Housing for All-Urban); Pradhan Mantri Awaas Yojana-Gramin (PMAY-G); Swachh Bharat Mission (SBM); Swachh Bharat Mission-Gramin (SBM-G); National Rural Drinking Water Programme (NRDWP); Digital India Land Records Modernization Programme (DILRMP); Deen Dayal Upadhyaya Gram Jyoti Yojana (DDUGJY); National Health Mission (NHM); Sarva Shiksha Abhiyan (SSA); Integrated Child Development Scheme(ICDS); Mid-Day Meal Scheme; Pradhan Mantri Ujjwala Yojana (PMUY); Digital India-Public Internet Access Programme providing Common Service Centre in each Gram Panchayat; Prime Minister's Employment Generation Programme (PMEGP) chungchang an rel a ni.