3060/2022-2023
Aizawl the 15th December 2022 : Vawiin khan Labour, Employment, Skill Development & Entrepreneurship Department (LESDE) chuan Hmeichhia, PwD leh zirlai mahni thiam thil hmanga eizawnna kalpui mekte chawikan nan Christmas Fair a buatsaih chu Nl. Vanrammawii’n a hawng a, he Christmas Fair hi December ni 15 leh ni 16 chhung Aijal Club Park ah mipui tlawh theih tura hawn a ni.

Christmas Fair hawnna hun tawi buatsaih hi Pi Angela Zothanpuii, Director LESDE Department chuan a kaihhruai a. He hunah hian Khuallian chuan,‘LESDE Department in Hmeichhiate,PwD te leh zirlaite mahni kutkawih eizawnna kawng zawhtute dinhmun chawikan pawimawhna leh fuihna thu a sawi a.
Pu Lalramsanga Sailo, Secretary, LESDE Department pawhin thu sawiin “Tunlai khawvel hmasawnna kal zelah, Thalaite thiam thil hmanga eizawnna kawng an zawh theihna tura LESDE Department-in theih tawp a chhuah mek", a ti. Pu T Thangropianga, Jt. Director, LESDE Department chuan lawmthu sawiin Fair hawnna hun hi tih tawp niin mipuite tlawh theiha hawn zui nghal a ni.

Christmas Fair-ah hian Hmeichhia, PwD leh Zirlai ten anmahni kutkawih hmanga thil siamchhuah chi hrang hrang Stall 43-ah phochhuah a ni a, December ni 15 leh ni 16 zing dar 10:30 atanga Zan dar 8:00 thleng mipui ten an duhzawng lei theih turin hawn a ni a, Ei leh In lam leh naupang intihhlimna tur hrang hrang chhawpchhuah a ni bawk a ni.