3059/2022-2023

Champhai, the 15th December, 2022: District Level Narco Coordination Centre (NCORD) Committee, Champhai District thutkhawm vawi 4-na chu vawiin chawhma dar 11 khan an Chairperson Pu James Lalrinchhana, District Bawrhsap hovin Excise & Narcotics Department Meeting Hall-ah neih a ni.

Pu James Lalrinchhana chuan NCORD thutkhawm vawi 4-na member te'n ngaipawimawha kokim taka neih a ni chu lawmawm a tih thu sawiin, ram leh hnam run mektu ruihhlo do kawnga official, NGO, media, kohhran leh khawtlang mipuite inkara thawhhona tha tak Champhai District-a awm chu fakawm a ti a. Mahni hmazawn theuhah theihtawp kan chhuah avang leh kan thawhhona avangin tun hun hi kan thleng thei a ni, a ti a. Ruihhlo tam tham taka mante chu Mizoram mai nilo ram chhung hmun dangte thlenga tawlh tura ruahman anih theih thu sawiin, helaia theihtawp kan lo chhuah hi India ram hmun dangte himna tur pawh a ni tel vek a ni, a ti a. Ruihhlo tawlh leh hmansual venna kawnga hmalakna chuan HIV/AIDS darh zel tur ven kawngah pawh nasa takin awmzia a neih thu sawiin, kalkhawmte chu ruihhlo do kawngah tun aia nasa zawka tang tur leh ram leh hnam tan a ni tih hriaa theihtawp chhuah zel turin a sawm nghal bawk.

Convener Pu Lalrinpuia Varte, SP Champhai chuan dan leh thupek kengkawhtu leh roreltute tha taka tawiawma thil sual tituin a phu tawk hremna a hmuh theih nana thlawp chu khua leh tuite mawhphurhna, ram danin a phut tlat anih thu a sawi a. Mipuite chu thu hretu a tan hreh lo tur leh thuneitute tha taka thlawp turin a sawm a. Ruihhlo phurh nana lirthei hman thin chu ND&PS Act in a phal loh thu sawiin, hetiang kawnga inhnamhnawih mante dan hnuaiah hremna pek zel theih anih thu a sawi bawk.

Vawiin thutkhawmah hian meeting hmasa thurel bawhzui dan tlangpuite ngaihthlak a ni a. Ruihhlo avanga man case kalpui lai mek neih zat leh ruihhlo ngawlvei/hmangsual awm tam dante pawh zirchiang tura bawhzui mek anih thu he hunah hian ngaihthlak a ni a. Meeting hmasa November ni 21, 2022 leh December ni 15, 2022 inkarah Joint Operation tum khat neih niin, Excise & Narcotics case 3 leh Police case 1 ziahluh a ni a. Anti Drugs Awareness Campaign tum 4 neih a ni bawk.

Ruihhlo avanga mante chak zawka ND&PS Act hnuaia hremna pek an nih theih nan hriatpuitu tha leh a chinchang hria tam zawk neih a tul thu sawiho a ni a. Hemi kawnga inzirtirna legal awareness zau zawk neih a tul thu tarlan niin, mipuite hemi lama penchhuaka thahnemngai tura hrilhhriat a pawimawh thu ngaihthlak a ni a; YMA, Police leh Excise Department-te hemi kawngah hian hma la tura ruat an ni a. Ruihhlo kaihhnawiha mante buaipui kawnga chinfel ngaite bawhzui kawngah hmasawnna a awm thu leh fimkhur taka kalpui a tul thu tarlan a ni bawk a. Christmas hma ngeia Joint Operation neih leh nise an ti bawk.

He hunah hian Champhai District Police leh Excise & Narcotics Department Champhaite hmalakna kaltlanga kumin chhunga ruihhlo man zat leh Narcotic Drugs and Psychotropic Substances Act (ND&PS Act), 1985 hnuaia case ziahluh dan tlangpui Addl. SP Pu C.Lalengliana leh Asst. Commissioner of Excise & Narcotics Pu Vanlalvura Ralte te hnen atangin ngaihthlak a ni.

He huna tarlan anih dan chuan January ni 1, 2022 atanga vawiin December ni 15, 2022 thlengin Champhai District Police-ten ND&PS Act, 1985 hnuaiah case 85 an ziaklut a, mi 112 man niin heng zinga 27 te hi ramdang mi an ni. Heroin hawng 2,119/gram 27,548 (kg 27.548) man niin, tualchhung market-a a hlut zawng cheng nuai 635.70 a ni a. Methamphetamine mum 8,20,400 (kg 85.11), a hlut zawng cheng nuai 1640.80 man hu bakah Pseudoephedrine mum 1,80,000 (kg 28.80), cheng nuai 126 hu an man bawk. Ruihhlo man zawng zawng hlut zawng hi cheng nuai 2402.50 a ni.

Hemi hun chhung vek hian Excise & Narcotics Department Champhai te'n ND&PS Act, 1985 hnuaiah case 58 ziaklutin mi 72 an man a, heng zinga mi 20 te hi ramdang mi an ni. Heroin kg 9.136, tualchhung rate-a cheng nuai 109.63 man, Methamphetamine mum 4,65,700 (kg 46.57), cheng nuai 1397.10 man, Pseudoephedrine mum 8,896 (kg 1.24), cheng 53,396 man, Ganja kg 3.24, cheng 8,088 man leh Alprazolam mum 278, cheng 2,780 hu an man bawk a. An man zawng zawng hlut zawng hi cheng nuai 1507.38 vel a ni.

NCORD hi kum 2016 ah din a ni a, kum 2019 ah siam that niin tunhnaiah chak lehzuala kalpui a ni a. Kumin May ni 10 ah District Level NCORD Committee member-te State Sawrkarin a siam fel a; hmalaknate Narcotics Control Bureau (NCB) lamah online hmanga report zel thin a ni.