3058/2022-2023
Aizawl the 15th December 2022 :Vawiin khan National Health Mission Employee Union Mizoram (NEUM) General Conference Vawi 2-na chu Vanapa Hall-ah neih a ni a, Health & Family Welfare Minister Dr. R. Lalthangliana chu khuallian niin a hmanpui.

Khuallian chuan thusawiin December ni 12, 2020 khan Ministry of Health & Family Welfare buatsaih ‘Universal Health Coverage Day’ chu Varanasi (UP)-ah neih a ni a, hetah hian Mizoram chuan Ayushman Bharat Health Account (ABHA) ID siam hnem ber lawmman 2-na a la ni, a ti. Universal Health Coverage Day 2022 denchhena India ram state hrang hrangte inelna atana buatsaih National Heath Mission hnuaia Ayushman Bharat Health & Wellness Centres tinte NCD portal, e-Sanjeevani portal leh PMNDP portal hmanga Health & Wellness Centres-a damlo inentir zawng zawng te Health ID (ABHA-ID) lo siamsaka a titha zualte lawmman pekah Mizoram chu North East leh Hilly States te zingah pahnihna a ni thei a, Health & Wellness Centre Operational tur zat target pha zingah telin Mizoram chuan Award a dawn bawk thu a sawi. Hei hi Health Deparment hlawhtlinna mai ni lovin Mizoram mipui, sawrkar leh department-te thawhhona that vang a nih thu Minister chuan a sawi.

Health minister chuan NHM hnuaia thawktute chu Mizoram mipuiten hriselna tha an neih theihna tura nasa taka thawk thin an nih thu a sawi a. Covid-19 len zual lai phei kha chuan mahni in lum chhuahsana zan mu pawh tuah hman loa an thawhna chuan Mizoram chu Covid-19 vanga thi tlemna ber state ah a siam a ni, a ti. Mizoram chu HIV/AIDS-in min tibuai nasat thu leh a dona kawnga NHM hnathawkte hmalakna chu fakin, reiloteah he natna hian kiam lam a pan a beisei thu a sawi bawk. Mizoram chu nausen piang thi (Infant Mortality Rate) tlemna ber state a nih thu sawiin, hei hi NHM hnuaia thawkte inpekna rah a ni, a ti a. An hnathawh chu Mizo mipuite thinlungah a awm reng tur thu leh an chhuanawm thu a hrilh bawk.

Dr.R.Lalthangliana chuan Mizorama sub-centre - Primary Health Centre(PHC) leh Community Health Centre(CHC)-te pawh Ayushman Bharat programme hnuaiah Health and Wellness Centres-ah hlanchhoh mek zel a ni a, a thawktu tur Health and Wellness Officer-te pawh thlaruk chhung training pek an nih hnuah dah vek tum a ni a, thingtlang leh hmun kilkhawr Doctor awm lohna hmunah pawh damlo enkawltu tha tak an awm tawh dawn a ni, a ti. Super Specialty Cancer & Research Centre, Zemabawk ah pawh din thuai ani dawn a, chu chuan nasa takin hriselna lamah hmasawnna a thlen dawn thu a sawi.

Health minister chuan NHM hnuaia thawktute harsatna hrang hrang-New Pension Scheme, pay revised, direct funding leh Service chungchang te pawh chak zawka hmalak mek zel a nih thu a sawi.

Vawiin NHM Employee Union Mizoram (NEUM) General conference hi NEUM Chairman Pu Malsawmtluanga Hauhnar chuan kaihruaiin Secretaty Report te ngaihthlak ani a, chawhnu lamah NEUM hruaitu thar thlanna neih nghal a ni.