Vawiin hian Lawngtlai DC Conference Hall ah District Magistrate Pu J. Hmingthanmawia hovin Police Department, Information & Public Relations Department, Village Councils leh Tlawmngaipawl hrang hrang aiawhten Christmas leh Kumthar him leh hlim taka hman anih theihna tura thil pawimawh hrang hrangte an sawiho.

Chairman Pu J. Hmingthanmawia chuan, Kristiante hun pui ber Christmas leh Kumthar lo thleng turah mipuiten hlim leh him taka kan hman tlan theih nan hal mawi, halpuah, silai lem a mu kap chhuak thei te, zawrh, kawl leh hman khapna thupek Cr.pc 144 tlawhchhana November ni 13 ah chhuah a nih tawh thu a sawi a. A bak thil tul dangte pawh ruahmanna siam chhoh zel a nih tur thu sawiin, mipuite chu dan phalloh thilte laka fihlim tur leh midangte tana hnawksak zawnga khawsa lo turin a ngen a. Hlim taka Christmas leh Kumthar lawm theuh turin duhsakna a hlan a ni. Lawngtlai SP Pu Lalsanglura pawhin hunpui chhunga hmun engemawzata Police Beat Post siam a nih tur thute, Patrolling ngawrh zawka neih a nih tur thute leh venhimna lama ruahmanna an siam mekte a sawi ve bawk.

Hengte bakah Meeting-ah hian sawrkar leh tlawmngaipawlte tangruala dan phalloh bungraw zuar dapchhuah dan turte, zu leh zu lei chungchanga dan pela thiltih chingte ven dan tur te, tualchhunga a ruka zu sa dapchhuah dan turte, khawchhunga lirthei chak tak taka khalh chingte leh mahni inchhungkhur leh midangte tihbuai chingte ven dan tur ruahmannate siam a ni a.

Sawrkar bultumin intihhlimna hun buatsaih a ni dawn bawka, kumin ni hnuhnung ber Dt 31.12.2015 tlai lam dar 2:30 p.m atangin kumhlui ni tla tur thlir liam pahin 71 RCC kiang kawngpui pengthuam zau laiah Concert ropui tak buatsaih a ni ang.

He Meeting-ah hian Lawngtlai Town Village Council zawng zawng aiawh, YLA Branch tin aiawh, MJA, MUP, MHIP, LWA, LSA aiawhte leh Central YLA Office Bearer te an tel a ni.