Pu P.C. Lalthanliana, Social Welfare Minister hovin vawiin khan Ramhlun Indoor Stadium-ah World Disabled Day hman a ni a. Inkhawm hi Social Welfare Department, Commissioner for PwDs, SCERT, Health, SSA, RMSA, NIOH Regional Office, Govt. of India leh Rualbanlo te tana tlawmngai pawl hrang hrang tangkawp buatsaih a ni a, Pi B. Sairengpuii, Commissioner, PwD in inkhawm hi a kaihruai a ni.
Pu P.C. Lalthanliana chuan khawvelah hian Ni pawimawh tak tak hman thin a ni a, mahse International Day of Persons with Disabilities hi chu pianphunga rualbanlote induhsakna Ni a ni. Rualbanlote tana thawktu mimal ang leh pawl (NGO) thahnem ngai taka thawktu zawng zawngte hnenah sorkar aiawhin Minister chuan lawmthu a sawiin inpekna thar nen an hnathawh theuhte chhunzawm zel turin a chah a. Mizoram sorkar-in rualbanloten hamthatna an dawn tur ang an dawn theihna tur leh an chanvo dik tak an chan theihna turin theih tawpin hma a lak reng thu sawiin chung zingah chuan Handicapped Training Centre, Lunglei leh Aizawl ah neih anih thu leh heng hmunah hian puanthui, pheikhawk siamte zirtir an nih thu a sawi a. Rualbanlote certificate mi 9578 hnenah pek tawh anih thu leh hemi atan hian hmalak mek anih thu
Minister chuan a sawi bawk. Minister hian rualbanlo thlanchhuahte hnenah Hearing Aids, Wheelchair leh an mamawh tur bungrua hlanna hun a hmang nghal a ni.
Pu Alendra Tripathi, Officer i/c NERC-NIOH pawhin thusawina hun hmangin India hmarchhakah chuan Mizoram hian Disabled Certificate chungchangah a ti tha lawr lak a ni a ti.
Kum 2011 chhiarpui (census )-ah Mizoram ah mihring 10,97,206 zingah rualbanlo 15,160 an awm a. Heng rualbanlote hamthatna, dikna leh chanvote humhalh leh ruahmansak a nih theih nan, Dan tha tak ‘The Persons with Disablities (Equal Opportunities, Protection of Rights and Full Participation) Act, 1995’ chu Mizoram-ah pawh 2nd February, 1996 atangin hman tan a ni a. He Dan seciton 73 (1) in a phut angin ‘The Mizoram Persons with Disabilities (Equal Opportunities, Protection of Rights and Full Participation) Rules, 1999 pawh siam niin, 12th August, 1999 atangin hman nghal a ni bawk. Chuvangin, heng Dan te ngai pawimawh tur leh rualbanlote enkawlna, an dikna leh chanvo te humhalh turin mitinin mawhphurhna an nei tih an hriat thar lehna atan he ‘Ni’ - World Disabled Day hi hman thin a ni.
