2452/2025-2026

Dated Siaha, November 28, 2025: Vawiin dar 3:00 PM khan DC’s Mini Conference hall, Siahaah kumin Christmas leh kumthar lo thleng tur vuakveta Siaha District mipui ten him leh thlamuang taka hunpui an hman theih dan tur ngaihtuahin thutkhawmna neih a ni a . Pu VL Hruaizela Khiangte, District Bawrhsap chuan he hun hi a kaihruai.

Pu VL Hruaizela Khiangte chuan kalkhawmte hnena lawmthu sawina a nei a. Christmas leh kumthar  hian vantlang mipuite thinlungah thuk takin  hmun a luah a, mi tin hlim lai hun anih avangin dan leh thupek kengkawh kawngah te, mipui himna ngaihtuah chunga mi dang hlimna tibuai lo zawnga hma awm  thiam a pawimawh hle a ni a ti. Christmas leh kum thar zalen taka hman a nih theih nan theihtawp chhuah a nih tur thu a sawi a.  Hunpuiah hian sawrkar leh tlawmngai pawl thawhhona tha tak hnuaiah lo chuan dan leh thupek kenkawh a harsat avangin lungrual taka Magistrate, Police leh NGOs te thawhho a ngai tiin Bawrhsap chuan mipuite pawh  thupek zawm thiam turin a sawm nghal bawk.

Thutkhawmah hian Christmas leh Kumthar vuakveta mipui hriattur pawimawh hrang hrang rel a ni a.

Halpuah leh halmawi khapna District Magistrate- atangin tihchhuah ni se, mipuiin a zau thei ang bera an hriat theihna turin veng tina vantlang aurinna atanga au tura ngenna siam’ ni se an ti a. Bazar leh hmun lun laia mipui chakkhai mamawh lamkhawmte lirthei dahna tur (parking area) mumal taka siam ni se an ti bawk a ni. Helipad - chu 'restricted area' a nih angin hemi hmuna mipui  leh lirthei lut turte lo enfiah turin Tourist Lodge - pengah 'Duty Post siam ni se,  hetah hian DTO, Police leh RTO, MADC thawktute inchhawkin duty thin nise an ti  a ni.

Vawiin hun hmannaah hian Pi S. Lalmuanpuii, Sr. LAO (MADC), Pi Zorinsangi, SDC, Pu Lalnunfela Chhangte, SDC, Police, DTO, RTO (MADC) leh MJA aiawh an tel a, Pu VL Hruaizela Khiangte, chuan  lawmthu sawina neiin hun a khar.